పోలింగ్‌కు రెండు రోజుల ముందు నుంచి మద్యం విక్రయాలు బంద్

భువనగిరి: ప్రశాంత వాతావరణంలో, పారదర్శకమైన ఎన్నికల నిర్వహణలో భాగంగా ఈనెల 13వ తేదీన పార్లమెంట్ ఎన్నికల పోలింగ్ జరగనుంది. ఈనెల 11న సాయంత్రం 5 గంటల నుంచి 13వ తేదీ సాయంత్రం 6 గంటల వరకు, లేదా పోలింగ్ ప్రక్రియ పూర్తి అయ్యేంత వరకు, అలాగే జూన్ 4న కౌంటింగ్ పూర్తి అయ్యేంత వరకు జిల్లాలో అన్ని వైన్ షాపులు, బార్లు, కల్లు దుకాణాలు, కల్లు డిపోలు బంద్ చేయాలని జిల్లా ఎన్నికల అధికారి, కలెక్టరు హనుమంతు కే.జెండగే తెలిపారు. దీనికి అనుగుణంగా ఎక్సైజ్ శాఖ అన్ని వైన్ షాపులు, బార్లు, కల్లు దుకాణాలు, కల్లు డిపోలను బంద్ చేసింది. ఈ నిబంధనను ఉల్లంఘించినట్లయితే 1951 ప్రజా ప్రాతినిథ్యం చట్టం 135 సీ సెక్షన్ ప్రకారం చర్యలు తీసుకుంటామని అధికారులు తెలిపారు.