వ్యక్తి దారుణ హత్య

ఆంగోతు జగ్రు
కొండమల్లేపల్లి, న్యూస్‌టుడే: మండలంలోని ఆంగోతుతండాలో ఓ వ్యక్తి గురువారం తెల్లవారుజామున దారుణ హత్యకు గురయ్యాడు. పోలీసులు తెలిపిన వివరాల ప్రకారం.. తండాకు చెందిన ఆంగోతు జగ్రు(50) వ్యవసాయం చేసుకుంటూ జీవనం సాగిస్తున్నారు. బుధవారం మండలంలోని కొలుముంతలపహడ్‌ గ్రామంలో అతని బంధువుల ఇంట్లో జరిగిన శుభకార్యానికి భార్య, పిల్లలతో కలిసి వెళ్లాడు. భార్యను అక్కడే ఉంచి తన కుమార్తెతో కలిసి తండాకు వచ్చాడు. కూతురు ఇంట్లో.. అతను ఆరుబయట నిద్రించాడు. తెల్లవారుజామున అలజడి రావడంతో కూతురు బయటికి వచ్చి చూడగా జగ్రు తల ఛిద్రమై విగత జీవిగా పడి ఉన్నాడు. సీఐ ధనుంజయ, ఎస్సై రాంమూర్తి ఘటనా స్థలికి చేరుకుని పరిశీలించారు. మృతునికి భార్య నలుగురు కుమార్తెలు, ఒక కుమారుడున్నారు. భార్య ఫిర్యాదు మేరకు కేసు నమోదు చేసుకుని దర్యాప్తు జరుపుతున్నట్లు పోలీసులు తెలిపారు. తండాలో ఎలాంటి ఉద్రీక్తత చోటు చేసుకోకుండా సీఐ ధనుంజయ పోలీసులు బందోబస్తు ఏర్పాటు చేశారు.