కనుల పండువగా చైత్రోత్సవాలు

రాయగడ, న్యూస్‌టుడే: శక్తి స్వరూపిణి, శాంతి స్వరూపిణి మజ్జిగౌరీ అమ్మవారి చైత్రోత్సవ సంబరాలు అంగరంగ వైభవంగా ప్రారంభమయ్యాయి. శుక్రవారం సున్నాభేషొ (బంగారు ఆభరణాలతో) అలంకరణలో అమ్మవారిని దర్శించుకున్న భక్తులు తన్మయత్వం చెందారు. హోమ మండపం, ఘట మండపాల శుద్ధి, పుణ్యాహవచనం జరిగింది. అమ్మవారి పాదాలు, అక్క చెల్లెళ్లను తీసుకొచ్చి అఖండ జ్యోతి వెలిగించారు. పురోహితుడు బిరంచి నారాయణ దాస్‌తోపాటు అస్కా జిల్లా కబిసూర్జ్య నగర్‌ నుంచి వచ్చిన దుర్గా ఉపాసకులు పూజలు నిర్వహించారు. ఆలయ ట్రస్టు అధ్యక్షుడు రాయిసింగి బిడిక, ట్రస్టు సభ్యులు ఇప్పిలి సన్యాసిరాజు, వడ్డాది శ్రీనివాసరావు దంపతులు పాల్గొన్నారు. ఆలయ ప్రాంగణమంతా ఆధ్యాత్మికత నెలకొంది.