ధాన్యం కొనండి మహాప్రభో

కలెక్టరేట్‌ ముందు నిరసన తెలుపుతున్న జమదాల రైతులు

కలెక్టరేట్‌ ప్రాంగణం, న్యూస్‌టుడే: పార్వతీపురం మండలం జమదాల, జమ్మిడివలస గ్రామాల్లో మిగిలి ఉన్న ధాన్యం కొనుగోలు చేయాలని పలువురు రైతులు కలెక్టరేట్‌ ముందు సోమవారం నిరసన తెలిపారు. రెండో విడతలో కొంటామని చెప్పి పది రోజులవుతున్నా ఒక్క గింజ కూడా తీసుకోలేదన్నారు. జమగాల పరిధిలో కల్లాల్లోనే రెండు వేల ధాన్యం బస్తాలు ఉన్నాయన్నారు. సీతానగరం, కొమరాడ, జియ్యమ్మవలస, గరుగుబిల్లి మండలాల్లోనూ ఇదే పరిస్థితి ఉందన్నారు. ఇప్పటికే రైతుల నుంచి పంట సమాచారం సేకరించామని, ప్రభుత్వం అనుమతి ఇస్తే సేకరణ ప్రారంభిస్తామని పౌర సరఫరాల అధికారులు  తెలిపారు.

వినతి..

పాలకొండ, న్యూస్‌టుడే: జిల్లాలో రైతుల వద్దనున్న ధాన్యాన్ని పూర్తిస్థాయిలో కొనుగోలు చేయాలని ఆంధ్రప్రదేశ్‌ రైతు సంఘం జిల్లా కార్యదర్శి బుడితి అప్పలనాయుడు కోరారు. ఈ మేరకు సోమవారం సబ్‌ కలెక్టర్‌ నూరుల్‌ కమర్‌ను కలిసి వినతిపత్రం అందించారు. పాలకొండ, వీరఘట్టం, జియ్యమ్మవలస మండలాల్లో ఇంకా చాలాచోట్ల పొలాల్లోనే పంట ఉందన్నారు. నాయకులు కె.రామ్మూర్తినాయుడు, సీహెచ్‌.లక్ష్మీనారాయణ, బి.వెంకటరమణ, పి.రమణ, బి.పారినాయుడు పాల్గొన్నారు.