అక్రమ నియామకాలు.. అనుమతులు

డీఎంహెచ్‌వోపై నేడు విచారణ

ఒంగోలు నగరం, న్యూస్‌టుడే: డీఎంహెచ్‌వో డాక్టర్‌ ఎస్‌.రాజ్యలక్ష్మిపై వచ్చిన ఫిర్యాదులపై మంగళవారం విచారణకు నిర్ణయించారు. ఈ మేరకు వైద్య ఆరోగ్య శాఖ రీజినల్‌ డైరెక్టర్‌, విచారణ అధికారి పి.పద్మశశిధర్‌ వైద్యశాఖ కార్యాలయానికి సోమవారం సమాచారం పంపారు. తగిన ఆధారాలతో విచారణ కమిటీ ఎదుట హాజరుకావాలని ఆమెను కోరారు. ఒంగోలు నగరంలో గత ఏడాది కొత్తగా ప్రారంభించిన ప్రైవేట్‌ నర్సింగ్‌ హోంలకు నిబంధనలకు విరుద్ధంగా లంచాలు తీసుకుని అనుమతులు ఇచ్చారని, ఫిజియోథెరపిస్టు, ల్యాబ్‌ టెక్నీషియన్‌ పోస్టుల నియామకాల్లో అక్రమాలు చోటుచేసుకున్నాయని పలువురు ఉన్నతాధికారులకు ఫిర్యాదు చేశారు. అదే విధంగా కార్యాలయం సూపరింటెండెంట్‌ పయ్యావుల శ్రీనివాసరావుపై ఏసీబీ కేసులు పెండింగ్‌లో ఉన్నప్పటికీ నియామకాలకు సంబంధించిన కీలక బాధ్యతలు ఆయనకు అప్పగించారని అందులో పేర్కొన్నారు. వీటికి సంబంధించిన దస్త్రాలు విచారణ సమయంలో సమర్పించాలని డీఎంహెచ్‌ని విచారణాధికారి ఆదేశించారు.