మీకంటే రౌడీషీటర్లు నయం

సమీక్షలో ఐజీ ఆగ్రహం

మాట్లాడుతున్న సర్వశ్రేష్ట త్రిపాఠి.. చిత్రంలో ఎస్పీ గరుడ్‌ సుమిత్‌ సునీల్‌

ఒంగోలు నేరవిభాగం, న్యూస్‌టుడే: ‘ఎన్నికల ప్రక్రియలో మీరు ఘోరంగా విఫలమవుతున్నారు. నామినేషన్ల వేళే మీ సామర్థ్యం ఏంటో తెలిసింది. వంద మీటర్ల పరిధి దాటకుండా పార్టీల కార్యకర్తల్ని అడ్డుకోలేకపోయారు. మీతో పోల్చుకుంటే గ్రామాల్లో రౌడీషీటర్లే ప్రజలను నియంత్రిస్తున్నారు. అధికారం ఉండీ మీరేమీ చేయలేకపోతున్నారు. ఈ క్రమంలో మీరు బెటరా! రౌడీషీటర్లు బెటరా!!’ అని గుంటూరు రేంజ్‌ ఐజీ సర్వశ్రేష్ట త్రిపాఠి పోలీసు అధికారులపై తీవ్ర ఆగ్రహం వ్యక్తం చేసినట్లు సమాచారం. ఎన్నికల ప్రచారపర్వంలో భాగంగా సీఎం జగన్‌ మోహన్‌ రెడ్డి టంగుటూరులో మంగళవారం పాల్గొన్నారు. ఈ కార్యక్రమం ముగిసిన అనంతరం ఐజీ త్రిపాఠి ఒంగోలులో పోలీసు అధికారులతో సమావేశం నిర్వహించారు. కొందరి వ్యవహార తీరుపై తీవ్ర అసంతృప్తి, అసహనం వ్యక్తం చేసినట్లు తెలిసింది. సార్వత్రిక ఎన్నికల నేపథ్యంలో జిల్లాలో ఎక్కడా ఎలాంటి అవాంఛనీయ సంఘటనలకు తావులేకుండా అన్ని జాగ్రత్తలు తీసుకోవాలని సూచించారు. ప్రజలు స్వేచ్ఛగా, శాంతియుతంగా ఓటుహక్కు వినియోగించుకునేలా పటిష్ఠ బందోబస్తు ఏర్పాటు చేయాలని చెప్పారు. ఏదైనా అనుకోని సంఘటనలు జరిగితే సంబంధిత అధికారులపై చర్యలు తప్పవని హెచ్చరించారు. సమావేశంలో జిల్లా ఎస్పీ గరుడ్‌ సుమిత్‌ సునీల్‌, అదనపు ఎస్పీ నాగేశ్వరరావు, ఏఆర్‌ అదనపు ఎస్పీ అశోక్‌బాబు, జిల్లాలోని డీఎస్పీలు పాల్గొన్నారు.