సికింద్రాబాద్‌ నుంచి ఏపీ, ఒడిశాలకు ప్రత్యేక రైళ్లు

ఈనాడు, హైదరాబాద్‌: సికింద్రాబాద్‌ నుంచి ఒడిశాలోని ఖుర్దారోడ్‌కు 2రోజులపాటు 2ప్రత్యేక రైళ్లు నడపనున్నట్లు దక్షిణ మధ్య రైల్వే తెలిపింది. ఈ నెల 10, 11 తేదీల్లో సాయంత్రం 4.30 గంటలకు ఇవి (07129, 07131) సికింద్రాబాద్‌ నుంచి బయలుదేరతాయి. నల్గొండ, నడికుడి, పిడుగురాళ్ల, విజయవాడ, భీమవరం, రాజమండ్రి, విజయనగరం మీదుగా ప్రయాణిస్తాయి. 13న ఏపీ, ఒడిశాల్లో పోలింగ్‌ జరగనున్న నేపథ్యంలో ఆ రాష్ట్రాల ప్రయాణికుల్ని దృష్టిలో పెట్టుకుని రైల్వేశాఖ ఈ రైళ్లను ప్రకటించింది. 11, 12 తేదీల్లో ఖుర్దారోడ్‌ నుంచి ఈ రెండు రైళ్లు (07130, 07132) రాత్రి 10 గంటలకు తిరుగు ప్రయాణమై సికింద్రాబాద్‌కు చేరుకుంటాయి. సికింద్రాబాద్‌-నరసాపురం మధ్య ఈ నెల 10న ప్రత్యేక రైలు(07133) నడపనున్నట్లు ద.మ.రైల్వే తెలిపింది. శుక్రవారం రాత్రి 7.40కి సికింద్రాబాద్‌ నుంచి బయలుదేరి నల్గొండ, సత్తెనపల్లి, గుంటూరు, గుడివాడ, భీమవరం, పాలకొల్లు మీదుగా నరసాపురం చేరుతుంది. 11న ఇదే దారిలో రైలు(07134) తిరుగు ప్రయాణమవుతుంది.