ఆదివారం అందని వైద్య సేవలు

జనగామటౌన్‌ : జనగామ జిల్లా ఆసుపత్రికి ఆదివారం ఓపీకి సెలవు ప్రకటించడంతో రోగులు ఎవరూ పరీక్షలకు రాలేదు. అత్యవసర సేవలకు వస్తే పరీక్షలు చేయడానికి వైద్యులు విధుల్లో ఉన్నారు. అప్పటికే ఇన్‌పేషెంట్లుగా చేరిన వారికి వార్డులో డాక్టర్‌ ఉల్లెంగుల ప్రవీణ్‌ వైద్య సేవలు అందించారు. రోగుల వద్దకు వెళ్లి వైద్య సిబ్బంది గ్లూకోజ్‌లు, ఇతర సెలైన్లు ఎక్కించారు.

మొత్తం వైద్యుల సంఖ్య: 14

వచ్చిన వారు : 6

మందులు తీసుకెళ్తున్నా..

- సోమక్క, సిరిసన్నగూడెం

గత రెండు, మూడు రోజులుగా జ్వరం వస్తోంది. అందుకే ఆదివారం వైద్యులను చూపించుకుందామని ఆసుపత్రికి వచ్ఛా వారెవరూ రాలేదని సిబ్బంది చెప్పడంతో గత్యంతరం లేక కొన్ని ఔషధాలు అందజేశారు. చేసేదేమి లేక వెళ్లిపోతున్నా. మళ్లీ సోమవారం ఆసుపత్రికి వస్తాను.

విధులకు ఏఎన్‌ఎం ఒకరే హాజరు

జఫర్‌గఢ్‌ : జఫర్‌గఢ్‌లోని సామాజిక ఆరోగ్య కేంద్రానికి (సీహెచ్‌సీ) సెలవు దినంగానే ఉంది. నలుగురు వైద్యులు, ఇద్దరు స్టాఫ్‌ నర్సులున్నా ఒకరూ రాలేదు. స్వీపర్‌, ఏఎన్‌ఎం మాత్రమే హాజరయ్యారు. రెండు గంటల వ్యవధిలో 20 మంది రోగులు వచ్చారు. వారి ఇబ్బంది తెలుసుకొని ఏఎన్‌ఎం కమల ఫార్మసిస్టు(మందులు ఇచ్చే) గదికి వెళ్లి మాత్రలు అందజేశారు. మండలంలోని తిమ్మాపూర్‌కు చెందిన గర్భిణికి పురిటి నొప్పులు వస్తున్నాయని స్థానిక ఆశ కార్యకర్త ఏఎన్‌ఎంకు ఫోన్లో తెలియజేయగా, వైద్యాధికారి భరత్‌కుమార్‌కు సమాచారం ఇచ్చారు. 12 గంటల తర్వాత ఆయన వచ్చి పరీక్షించి, సాధారణ కాన్పు కాదని ఆపరేషన్‌ చేయాలని చెప్పడంతో ఆమెను వరంగల్‌ ప్రభుత్వ ఆసుపత్రికి తరలించారు. తర్వాత ఆయన అక్కడి నుంచి వెళ్లిపోయారు.

మొత్తం వైద్యుల సంఖ్య: 4

వచ్చిన వారు : 0

మాతా శిశు ఆరోగ్య కేంద్రం..

జనగామ మాతా, శిశు ఆరోగ్య కేంద్రానికి(ఎంసీహెచ్‌) ఆదివారం ఓపీ సేవలకు సెలవు కావడంతో గర్భిణులు పరీక్షలు చేయించుకోవడానికి రాలేదు. ప్రసూతి కాన్పుకు సిద్ధంగా ఉన్న పలువురికి డాక్టర్‌ స్వప్నారాథోడ్‌ వైద్య పరీక్షలు చేశారు. అప్పటికే మరికొందరికి కాన్పు కోసం మరో వైద్యురాలు శస్త్ర చికిత్స గదిలో ఉన్నారు. అనస్తీషియా వైద్యుడు కూడా అందుబాటులో ఉన్నారు.

స్టేషన్‌ఘన్‌పూర్‌, న్యూస్‌టుడే: సీహెచ్‌సీకి వేర్వేరు సమయాల్లో పది మంది రోగులు వచ్చారు. వైద్యుడు అందుబాటులో లేకపోయినా.. గదిలో ఫ్యాను తిరుగుతూ కనిపించింది. వెంకటరమణ అనే స్టాఫ్‌నర్సు వచ్చిన వారికి చికిత్స అందించారు. అవసరమైన వారికి మందులు ఇచ్చి పంపించారు. సిబ్బంది కొరత కారణంగా 24 గంటలు విధులు నిర్వర్తించాల్సి వస్తోందన్నారు. ప్రతి వారం ఇదే పరిస్థితి ఉంటుందని రోగులు పేర్కొన్నారు. ఒక గర్భిణి రాగా పరీక్షల విభాగం లేదంటూ వెనక్కి పంపించారు. వారు జనగామ ఆసుపత్రికి వెళ్లిపోయారు.

మొత్తం వైద్యుల సంఖ్య: 6

వచ్చిన వారు : 0

అందుబాటులో వైద్యులు

బచ్చన్నపేట : బచ్చన్నపేటలోని కమ్యూనిటీ హెల్త్‌ సెంటర్‌లో ఇద్దరు వైద్యులు అందుబాటులో ఉన్నారు. ఆదివారం ఓపీకి ఏడుగురు వచ్చారు. వైద్యులు ఉదయం 10:30 గంటల వరకు అందుబాటులో ఉన్నారు. ఒక స్టాఫ్‌ నర్సు కూడా ఉన్నారు.