దస్తగిరి ప్రచార వాహనంపై రాళ్ల దాడి

దస్తగిరి ఫ్లెక్సీని చింపేసిన దుండగులు

వేంపల్లె, న్యూస్‌టుడే : మాజీ మంత్రి వైఎస్‌ వివేకా హత్య కేసు అప్రూవర్‌, జై భీంరామ్‌ భారత్‌ పార్టీ పులివెందుల ఎమ్మెల్యే అభ్యర్థి దస్తగిరి ప్రచార వాహనంపై ఆదివారం సాయంత్రం పులివెందులలో అల్లరి మూకలు దాడి చేశాయి. వాహనంపై ఫ్లెక్సీలు చించి వేశారు. ఎన్నికల ప్రచారంలో భాగంగా దస్తగిరి ప్రచార వాహనం నిత్యం పట్టణంలో తిరుగుతోంది. ఈ నేపథ్యంలో స్థానిక ముద్దనూరు రోడ్డులోని నాలుగు రోడ్ల కూడలి మీదుగా ఆదివారం ప్రచార వాహనం వెళుతుండగా గుర్తు తెలియని వ్యక్తులు రాళ్లతో దాడి చేశారు. సమాచారం అందుకున్న పోలీసులు సంఘటనా స్థలానికి చేరుకొని అల్లరిమూకలను చెదరగొట్టడంతో పరారయ్యారు. వైకాపా కార్యకర్తలే ప్రచార వాహనంపై దాడికి పాల్పడ్డారని దస్తగిరి విలేకరులకు తెలిపారు. ఈ ఘటనపై తమకు ఎలాంటి ఫిర్యాదు అందలేదని పోలీసులు తెలిపారు.