కరీంనగర్‌: కాంగ్రెస్‌కు ఓటు వేస్తే కుటుంబ పాలనకు ఓటు వేసినట్లేనని భాజపా ఎంపీ బండి సంజయ్‌ విమర్శించారు. కరీంనగర్‌లో నిర్వహించిన మీడియా సమావేశంలో ఆయన మాట్లాడారు. ఆరు గ్యారంటీలు ఎందుకు అమలు చేయలేదో కాంగ్రెస్‌ చెప్పాలని డిమాండ్‌ చేశారు. 

‘‘కేసీఆర్‌ కొత్త డ్రామాలకు తెరతీస్తున్నారు. మోదీ తనను అరెస్టు చేయాలని చూస్తున్నట్లు చెప్పారు. అవినీతిని భాజపా ప్రభుత్వం సహించదు. కేసీఆర్‌ కుటుంబం అవినీతికి పాల్పడింది. ఇక్కడి డబ్బుతో విదేశాల్లో పెట్టుబడులు పెడుతున్నారు. కాంగ్రెస్‌, భారాస నాణేనికి బొమ్మాబొరుసుగా ఉన్నాయి. ఆస్తులు, అక్రమ సంపాదనపై చర్చకు నేను సిద్ధం.. మీరు సిద్ధమా? హస్తం పార్టీ ఎక్స్‌పైరీ డేట్‌ అయిపోయింది. ఆ పార్టీ ఇప్పటివరకు చేసిన అవినీతి అక్రమాలు చాలు. కాంగ్రెస్‌ మాయమాటలకు ప్రజలు మోసపోవద్దు. అక్రమ సంపాదనతో గెలిచే ప్రయత్నం చేస్తున్నారు’’ అని బండి సంజయ్‌ విమర్శించారు.