సిరిసిల్ల: భారాస ప్రభుత్వంలో కేసీఆర్‌ కంటే ఎక్కువగా అధికారం చెలాయించింది కేటీఆరే అని కరీంనగర్‌ ఎంపీ బండి సంజయ్‌ విమర్శించారు. సిరిసిల్లలో నిర్వహించిన మీడియా సమావేశంలో ఆయన మాట్లాడారు. కేసీఆర్‌ కంటే ఎక్కువ దాదాగిరి, గూండాగిరి కేటీఆరే చేశారని.. సిరిసిల్లలో సమస్యలు మాత్రం పరిష్కారం కాలేదని ఆరోపించారు. ఇక్కడి నేతన్నల దుస్థితికి వాళ్లిద్దరే కారణమన్నారు.  

‘‘భారాస హయాంలో నేతన్నలకు బకాయిలు చెల్లించకుండా ముప్పుతిప్పలు పెట్టారు. వారికి 50 శాతం విద్యుత్‌ రాయితీ ఇస్తామని మోసగించారు. కాంగ్రెస్‌, భారాస పరస్పర దూషణలకు దిగుతున్నాయి. ఆ రెండు పార్టీలు మోసగించినందునే ప్రజలు భాజపాకు మద్దతుగా నిలిచారు. ఆరు గ్యారంటీల పేరుతో హస్తం పార్టీ మోసం చేసింది. పలు రూపాల్లో దోపిడీకి యత్నిస్తోంది. నేతన్నల బకాయిలు చెల్లిస్తామని మోసగించింది. కాంగ్రెస్‌ మాయమాటలను ప్రజలు నమ్మవద్దు’’ అని బండి సంజయ్‌ అన్నారు.