లోక్‌సభ పరిధిలోని అసెంబ్లీ స్థానాలు: ఏలూరు జిల్లాలోని 7 అసెంబ్లీ నియోజకవర్గాల పరిధిలో ఈ నియోజకవర్గం విస్తరించి ఉంది. ఉంగుటూరు, దెందులూరు, ఏలూరు, పోలవరం (ఎస్టీ), చింతలపూడి (ఎస్సీ), నూజివీడు, కైకలూరు అసెంబ్లీ నియోజక వర్గాలు దీని పరిధిలోకి వస్తాయి.

ఓటర్లు: 2024 ఓటర్ల జాబితా ప్రకారం ఈ నియోజకవర్గంలో 16.25 లక్షల మంది ఓటర్లు ఉండగా.. పురుషులు 7.94 లక్షలు, మహిళలు 8.30 లక్షలు, ట్రాన్స్‌జెండర్లు 129 మంది ఉన్నారు.

2019 సార్వత్రిక ఎన్నికల్లో తెదేపా అభ్యర్థి మాగంటి వెంకటేశ్వరరావుపై వైకాపా అభ్యర్థి కోటగిరి శ్రీధర్ గెలుపొందారు.

ఈసారి ప్రధాన పార్టీల నుంచి పోటీలో ఉన్న అభ్యర్థులు వీళ్లే!

ప్రస్తుతం ఈ స్థానం నుంచి తెదేపా అభ్యర్థిగా పుట్టా మహేష్‌ యాదవ్‌, వైకాపా అభ్యర్థిగా కారుమూరి సునీల్‌కుమార్‌ యాదవ్‌ను పోటీలో ఉన్నారు. పుట్టా మహేష్‌ యాదవ్‌... తెదేపా సీనియర్‌ నేత యనమల రామకృష్ణుడి అల్లుడు. ఆయన తండ్రి పుట్టా సుధాకర్‌ యాదవ్‌ పార్టీలో సీనియర్‌ నాయకుడు. ఆయన ఈ ఎన్నికల్లో వైయస్‌ఆర్‌ జిల్లా మైదుకూరు అసెంబ్లీ స్థానం నుంచి పోటీచేస్తున్నారు. ఏలూరు నుంచి బలమైన బీసీ అభ్యర్థిని బరిలో దించాలన్న ఉద్దేశంతో మహేష్‌ యాదవ్‌కు పార్టీ అవకాశమిచ్చింది. మరోవైపు వైకాపా కూడా బీసీ సామాజిక వర్గానికి చెందిన మంత్రి కారుమూరి నాగేశ్వరరావు కుమారుడు కారుమూరి సునీల్‌కుమార్‌ యాదవ్‌కు ఏలూరు ఎంపీ అభ్యర్థిగా అవకాశం కల్పించింది.  సునీల్‌ తొలిసారి ఎన్నికల్లో పోటీ చేస్తుండటం విశేషం. ఇక కాంగ్రెస్‌ నుంచి జంగారెడ్డిగూడేనికి చెందిన కావూరి లావణ్య పోటీ చేస్తున్నారు. ఎన్‌ఆర్‌ఐ అయిన ఆమె, ఇటీవల కాంగ్రెస్‌ సభ్యత్వం తీసుకుని, పార్టీ కార్యక్రమాల్లో చురుగ్గా పాల్గొంటున్నారు.

• గత ఎన్నికల్లో గెలుపొందిన అభ్యర్థులు వీళ్లే!
• 1952: బి.సూర్యనారాయణ మూర్తి (సీపీఐ)
• 1957:  మోతె వేద కుమారి (సీపీఐ)
• 1962: వి.విమల దేవి (కాంగ్రెస్‌)
• 1967: కొమ్మారెడ్డి సూర్యనారాయణ (కాంగ్రెస్‌)
• 1971: కొమ్మారెడ్డి సూర్యనారాయణ (కాంగ్రెస్‌)
• 1977: కొమ్మారెడ్డి సూర్యనారాయణ (కాంగ్రెస్‌)
• 1980: చిత్తూరి సుబ్బారావు చౌదరి (కాంగ్రెస్‌)
• 1984: బోళ్ల బుల్లిరామయ్య ( తెదేపా)
• 1989: ఘట్టమనేని కృష్ణ ( కాంగ్రెస్‌)
• 1991: బోళ్ల బుల్లిరామయ్య (తెదేపా)
• 1996: బోళ్ల బుల్లిరామయ్య (తెదేపా)
• 1998: మాగంటి వెంకటేశ్వరరావు (కాంగ్రెస్‌)
• 1999: బోళ్ల బుల్లిరామయ్య (తెదేపా)
• 2004: కావూరి సాంబశివ రావు (కాంగ్రెస్‌)
• 2009: కావూరి సాంబశివ రావు (కాంగ్రెస్‌)
• 2014: మాగంటి వెంకటేశ్వరరావు (తెదేపా)
• 2019: కోటగిరి శ్రీధర్‌ (వైకాపా)