లోక్‌సభ పరిధిలోని అసెంబ్లీ స్థానాలు:  ప్రస్తుతం దీని పరిధిలో ఏడు అసెంబ్లీ నియోజకవర్గాలు ఉన్నాయి. పునర్విభజన తరువాత విజయవాడ లోక్‌సభ స్థానం పరిధిలో విజయవాడ తూర్పు, మధ్య, పశ్చిమ, మైలవరం, నందిగామ, జగ్గయ్యపేట, తిరువూరు ఉన్నాయి. ఇందులో నందిగామ, తిరువూరు రిజర్వుడ్ స్థానాలు. 2022లో కొత్తగా ఎన్టీఆర్‌ జిల్లా ఆవిర్భవించింది.

ఓటర్లు: తాజా గణాంకాల ప్రకారం మొత్తం 16,75,381 ఓటర్లు ఉండగా, పురుషులు 8,17,837,  మహిళలు 8,57,394 ట్రాన్స్‌జెండర్లు 150 మంది ఓటర్ల ఉన్నారు.

2019 ఎన్నికల్లో వైకాపా అభ్యర్థి పొట్లూరి వరప్రసాద్‌పై తెదేపా అభ్యర్థి కేశినేని నాని విజయం సాధించారు.

ప్రస్తుత ఎన్నికల్లో విజయవాడ నుంచి తెదేపా అభ్యర్థిగా కేశినేని శివనాథ్‌ (చిన్ని) (Kesineni Chinni) పోటీ చేస్తున్నారు. ఉమ్మడి కృష్ణాజిల్లాలో పార్టీకి విధేయంగా పనిచేస్తూ, యువగళం పాదయాత్ర లాంటి కార్యక్రమాల్లో చురుగ్గా వ్యవహరించిన ఆయనకు అందరూ ఊహించినట్టే టికెట్‌ దక్కింది. మరోవైపు, విజయవాడ సిటింగ్‌ ఎంపీ కేశినేని నాని (Kesineni Nani) కొన్ని నెలల కిందటే  వైకాపాలో చేరారు. ఈ ఎన్నికల్లో వైకాపా విజయవాడ లోక్‌సభ అభ్యర్థి ఆయనే. కొన్ని నెలల కిందటి వరకూ వైకాపా అధినేత, సీఎం జగన్‌ను దుమ్మెత్తి పోసిన ఎంపీ నాని ఇప్పుడు ఆయన్ను కీర్తిస్తున్నారు. అమరావతి కావాలన్న ఆయన ఇప్పుడు వైకాపాకు వంతపాడుతున్నారు. మరోవైపు చిన్ని ఇవేవీ పట్టించుకోకుండా సేవా కార్యక్రమాలతో ముందుకు సాగుతున్నారు. అన్న క్యాంటీన్లు, వైద్య శిబిరాలు, జాబ్‌మేళాలతో జనంలోకి వెళ్లారు. దీంతో తాజా ఎన్నిక అన్నదమ్ముల మధ్య నువ్వానేనా అన్నట్లు ఉండటం ఖాయమని రాజకీయ విశ్లేషకులు చెబుతున్నారు. మరోవైపు కాంగ్రెస్‌ పార్టీ నుంచి వల్లూరు భార్గవ్‌ పోటీ చేస్తున్నారు.

• ఇప్పటివరకూ గెలుపొందిన అభ్యర్థులు వీరే!
• 1952: హరిశ్చంద్ర ఛటోపాధ్యాయ(స్వతంత్ర)
• 1957: కె.అచ్చమాంబ(కాంగ్రెస్)
• 1962: కె.ఎల్.రావు(కాంగ్రెస్)
• 1967: కె.ఎల్.రావు(కాంగ్రెస్)
• 1971: కె.ఎల్.రావు(కాంగ్రెస్)
• 1977: గోడే మురహరి(కాంగ్రెస్)
• 1980: చెన్నుపాటి విద్య(కాంగ్రెస్) (ఐ)
• 1984: వడ్డే శోభనాద్రీశ్వరరావు (తెదేపా)
• 1989: చెన్నుపాటి విద్య (కాంగ్రెస్)
• 1991: వడ్డే శోభనాద్రీశ్వరరావు తెదేపా
• 1996: పర్వతనేని ఉపేంద్ర (కాంగ్రెస్)
• 1998: పర్వతనేని ఉపేంద్ర (కాంగ్రెస్)
• 1999: గద్దె రామ్మోహన్ (తెదేపా)
• 2004: లగడపాటి రాజగోపాల్ (కాంగ్రెస్)
• 2009: లగడపాటి రాజగోపాల్ (కాంగ్రెస్)
• 2014: కేశినేని నాని(తెదేపా)
• 2019: కేశినేని నాని (తెదేపా)