లోక్‌సభ నియోజకవర్గం

రాజంపేట నియోజకవర్గ పరిధి ఆధారంగా కొత్తగా అన్నమయ్య జిల్లా ఏర్పాటు చేశారు. కడప, చిత్తూరు జిల్లాల సరిహద్దుల్లో ఉన్న ఈ లోక్‌సభ స్థానం ప్రత్యేకత కలిగి ఉంది. ఇంతకుముందు కడప జిల్లాలో నాలుగు సెగ్మెంట్లు, చిత్తూరు జిల్లాలో మూడు సెగ్మెంట్లు ఉండేవి. ఇక్కడి లక్కిరెడ్డిపల్లె రద్దవడంతో చిత్తూరు జిల్లాలోని నాలుగు సెగ్మెంట్లు చేరాయి. 1952లోనే నియోజకవర్గం ఏర్పాటైనప్పటికీ 1957 నుంచి ఎన్నికలు జరుగుతున్నాయి.

లోక్‌సభ స్థానం పరిధిలోని అసెంబ్లీ స్థానాలు: ఈ లోక్‌సభ పరిధిలో 7 శాసనసభా నియోజకవర్గాలున్నాయి. రాజంపేట, రైల్వేకోడూరు (ఎస్సీ), రాయచోటి, చిత్తూరు జిల్లాలోని మదనపల్లె, తంబళ్లపల్లె, పీలేరు, పుంగనూరు శాసనసభా నియోజకవర్గాలు దీని పరిధిలోకి వస్తాయి. 

ఓటర్లు: తాజా గణాంకాల ప్రకారం 16,42,282 ఓటర్లు ఉండగా, పురుషులు 8,07,588...  మహిళలు.. 8,34,550 ట్రాన్స్‌ జెండర్లు 144 ఉన్నారు.

2019 లోక్‌సభ ఎన్నికల్లో వైకాపా నుంచి పోటీ చేసిన మిథున్‌రెడ్డి తన సమీప ప్రత్యర్థి, తెదేపా అభ్యర్థి డి.ఎ.సత్యప్రభపై విజయం సాధించారు.

2024 ఎన్నికల్లోనూ వైకాపా నుంచి మిథున్‌రెడ్డి బరిలో నిలిచారు. పొత్తులో భాగంగా ఈ స్థానం భాజపాకు వెళ్లింది. మాజీ ముఖ్యమంత్రి నల్లారి కిరణ్‌కుమార్‌రెడ్డిని భాజపా బరిలో నిలిపింది. పార్లమెంటు పరిధిలో అన్ని ప్రాంతాలకు కిరణ్‌కుమార్‌రెడ్డి పరిచయమున్నారు. రాజకీయంగా చిరకాల అనుభవం ఉన్న నేతగా ఆయనకు గుర్తింపు ఉంది. ఈయన సోదరుడు నల్లారి కిశోర్‌కుమార్‌రెడ్డి రాజంపేట లోక్‌సభ పరిధిలోని పీలేరు శాసనసభా స్థానం నుంచి తెదేపా అభ్యర్థిగా పోటీ చేస్తుండటం గమనార్హం. కాంగ్రెస్‌ నుంచి ఎస్‌.కె.బషీద్‌ బరిలో నిలిచారు.

• ఇప్పటివరకూ గెలుపొందిన అభ్యర్థులు వీరే!
• 1957: టి.ఎన్.విశ్వనాథరెడ్డి (కాంగ్రెస్‌)
• 1962: సి.ఎల్.నరసింహా రెడ్డి (స్వతంత్ర)
• 1967: పి.పార్థసారథి (కాంగ్రెస్‌)
• 1971: పి.పార్థసారథి (కాంగ్రెస్‌)
• 1977: పి.పార్థసారథి (కాంగ్రెస్‌)
• 1980: పి.పార్థసారథి (కాంగ్రెస్‌)
• 1984: ఎస్.పాల కొండ్రాయుడు (తెదేపా)
• 1991: ఎ.సాయిప్రతాప్ (కాంగ్రెస్‌)
• 1996: ఎ.సాయిప్రతాప్ (కాంగ్రెస్‌)
• 1998: ఎ.సాయిప్రతాప్ (కాంగ్రెస్‌)
• 1999: గునిపాటి రామయ్య (తెదేపా)
• 2004: ఎ.సాయిప్రతాప్ (కాంగ్రెస్‌)
• 2009: ఎ.సాయిప్రతాప్ (కాంగ్రెస్‌)
• 2014: పెద్దిరెడ్డి మిథున్‌రెడ్డి (వైకాపా)
• 2019: పెద్దిరెడ్డి మిథున్‌రెడ్డి (వైకాపా)