దిల్లీ: దిల్లీ ముఖ్యమంత్రి కేజ్రీవాల్‌కు ప్రజల్లో ఉన్న మద్దతును తెలిపేందుకు ఆమ్ ఆద్మీ పార్టీ (ఆప్) దేశ రాజధానిలో వాకథాన్‌ను నిర్వహించింది. ఈ కార్యక్రమంలో ఎంపీ సంజయ్ సింగ్, మంత్రి గోపాల్ రాయ్, సౌరభ్ భరద్వాజ్‌తో సహా ఇతర నాయకులు పాల్గొన్నారు. ‘‘ప్రజాస్వామ్యయుతంగా, భారీ మెజారిటీతో ఎన్నికైన ముఖ్యమంత్రిని కేంద్ర ప్రభుత్వం ఎన్నికల ముందు ఎలాంటి ఆధారాలు, ఎఫ్‌ఐఆర్‌ లేకుండా అరెస్టు చేయించింది. రాజకీయ కారణాలతోనే ఈ విధంగా చేశారు. కేంద్రం తీరును దిల్లీ ప్రజలు వ్యతిరేకిస్తున్నారు. కేజ్రీవాల్ అరెస్టుకు ఓట్లతో తగిన సమాధానం ఇవ్వడానికి వారు సిద్ధంగా ఉన్నారు’’అని గోపాల్ రాయ్ అన్నారు.

‘‘మీ పిల్లల చదువులు, ఆరోగ్యం, విద్యుత్‌, నీళ్లు, మహిళలకు ఉచిత బస్సు ప్రయాణం కోసం కేజ్రీవాల్‌ అహోరాత్రులు శ్రమించారు. అటువంటి ఆయనను మోదీ ఓ క్రిమినల్‌లా చూస్తున్నారు. మన సీఎంను జైల్లో వేసినందుకు ఓటుతో సమాధానం చెబుదాం ’’అని సంజయ్‌ సింగ్‌ వ్యాఖ్యానించారు.