Parrot: ‘ఆ చిలుక నన్ను తెగ ఇబ్బంది పెడుతోంది’.. పోలీసులకు వృద్ధుడి ఫిర్యాదు

పుణె: పొరుగింట్లో పెంచుకుంటున్న ఓ చిలుక తనను తెగ ఇబ్బంది పెడుతోందని ఓ వ్యక్తి ఏకంగా పోలీసులకు ఫిర్యాదు చేశాడు. అరుపులు, కీచులాటతో నిద్రలేకుండా చేస్తోందని ఫిర్యాదులో పేర్కొన్నాడు. మహారాష్ట్ర పుణెలోని శివాజీనగర్ ప్రాంతంలో నివసించే అక్బర్‌ అజ్మెర్‌ ఖాన్‌ తన ఇంట్లో చిలుకను పెంచుకుంటున్నాడు. అయితే, దాని కీచులాట పొరుగింట్లో ఉండే సురేశ్‌ శిందే (72)ను తెగ ఇబ్బంది పెట్టిందట. దాని గోలకు సరిగా నిద్రపట్టడంలేదని, ప్రశాంతత లేకుండా పోతోందని అతడు తాజాగా ఖడ్కీ పోలీసులను ఆశ్రయించాడు.

వృద్ధుడి ఫిర్యాదుపై ఖడ్కీ పోలీసుస్టేషన్‌ అధికారి స్పందించారు. చిలుక ద్వారా ప్రశాంతతకు భంగం కలుగుతోందంటూ ఓ ఫిర్యాదు అందింది. నిబంధనల ప్రకారం చర్యలు తీసుకుంటామని పేర్కొన్నారు.