ఉప్పల్‌ స్టేడియానికి పోటెత్తిన అభిమానులు.. స్వల్ప ఉద్రిక్తత

హైదరాబాద్‌: ఉప్పల్‌ క్రికెట్‌ మైదానం పరిసరాల్లో సందడి నెలకొంది. ఐపీఎల్‌ -17 సీజన్‌లో భాగంగా హైదరాబాద్‌-చెన్నై మ్యాచ్‌ను వీక్షించేందుకు పెద్దఎత్తున అభిమానులు తరలివస్తున్నారు. రాత్రి 7.30కి మ్యాచ్‌ ప్రారంభం కానుండగా.. ఇప్పటినుంచే టికెట్లు ఉన్నవారిని తనిఖీ చేసి పోలీసులు లోపలికి అనుమతిస్తున్నారు. మ్యాచ్‌ నేపథ్యంలో ఉప్పల్‌ స్టేడియం పరిసరాల్లో ట్రాఫిక్‌ ఆంక్షలు విధించారు. ఇవాళ రాత్రి అదనంగా గంటపాటు మెట్రో రైళ్లు నడవనున్నాయి. మరోవైపు ఉప్పల్‌ మైదానానికి ఆర్టీసీ ప్రత్యేక బస్సులు నడుపుతోంది. చెన్నై జట్టు అభిమానులతో స్టేడియం పసుపుమయంగా మారింది. ఆ జట్టు జెర్సీలు ధరించి అభిమానులు భారీగా తరలివస్తున్నారు.  

ఇదిలాఉండగా.. ఉప్పల్‌ స్టేడియం గేట్‌ నెంబర్‌-4 వద్ద స్వల్ప ఉద్రిక్తత చోటుచేసుకుంది. టికెట్లు ఉన్నా లోపలికి పంపడం లేదని అభిమానులు ఆగ్రహం వ్యక్తంచేశారు. బారీకేడ్లను తోసేశారు. ఈక్రమంలో పోలీసులకు, క్రికెట్‌ ప్రేక్షకులకు మధ్య వాగ్వాదం, తోపులాట చోటుచేసుకుంది.