Telangana news: ప్రభుత్వ జూనియర్‌ కళాశాల విద్యార్థులకు ఉచిత ఎంసెట్‌ కోచింగ్‌

హైదరాబాద్‌: ప్రభుత్వ జూనియర్ కళాశాలల్లో చదువుతున్న విద్యార్థులకు ఉచిత ఎంసెట్ శిక్షణ ఇవ్వాలని ఇంటర్మీడియట్ బోర్డు నిర్ణయించింది. డిసెంబరులో ఇంటర్ సిలబస్ పూర్తి చేసి.. జనవరి, ఫిబ్రవరిలో కళాశాలల్లోనే శిక్షణ ఇవ్వనున్నట్లు కళాశాల విద్యా కమిషనర్ నవీన్ మిత్తల్ తెలిపారు. మెరిట్ విద్యార్థులను గుర్తించేందుకు ఫిబ్రవరిలో పరీక్ష నిర్వహించనున్నట్లు వెల్లడించారు. ప్రతి జిల్లాలో గ్రూప్ వారీగా 50 మంది బాలురు, 50 మంది బాలికలను ఎంపిక చేయనున్నారు. ఎంపికైన విద్యార్థులకు మార్చిలో వార్షిక పరీక్షలు ముగిసిన తర్వాత ఏప్రిల్, మే నెలలో ఉచిత రెసిడెన్షియల్ శిక్షణ ఇవ్వాలని నిర్ణయించారు. విద్యార్థులకు ఉచిత మెటీరియల్ కూడా అందిస్తారు. మోడల్ స్కూళ్లు, గురుకుల విద్యా సంస్థల ప్రాంగణాల్లో ఈ ఉచిత శిక్షణ ఇవ్వనున్నట్లు నవీన్ మిత్తల్ తెలిపారు. జిల్లా ఇంటర్ విద్యాధికారులు ప్రిన్సిపల్స్‌, సిబ్బంది, విద్యార్థులతో సమావేశాలు నిర్వహించి ఉచిత కోచింగ్‌కు సన్నద్ధం చేయాలని నవీన్ మిత్తల్ ఉత్తర్వులు జారీ చేశారు.