భారత్‌కు రానున్న ఆఫ్రికా చిరుతలు!

దిల్లీ: దేశంలో ఆఫ్రికా చిరుతలు జీవించేందుకు అనువైన వాతావరణాన్ని కల్పించేందుకు కేంద్ర ప్రభుత్వానికి సుప్రీం కోర్టు అనుమతించింది. అరుదైన భారతీయ చిరుతలు దాదాపుగా అంతరిస్తుండటంతో నమీబియా నుంచి ఆఫ్రికా చిరుతలను తీసుకొచ్చేందుకు అనుమతించాలని జాతీయ పులుల సంరక్షణ సంస్థ(ఎన్టీసీఏ) సుప్రీం కోర్టును కోరింది. ఈ అభ్యర్థనపై విచారణ జరిపిన ప్రధాన న్యాయమూర్తి జస్టిస్‌ ఎస్‌ఏ బాబ్డే నేతృత్వంలోని ధర్మాసనం, నమీబియా నుంచి ఆఫ్రికా చిరుతలను తీసుకురావడంలో మార్గనిర్దేశం చేసేందుకు ముగ్గురు సభ్యుల కమిటీని ఏర్పాటు చేసింది. ఆఫ్రికా చిరుతలను పెంచే ప్రదేశంపై ఈ కమిటీ సర్వే చేసి ఇచ్చే నివేదిక ఆధారంగా, ఓ నిర్ణయం తీసుకుంటామని సుప్రీం కోర్టు తెలిపింది. ఆ తర్వాత కూడా ప్రతి నాలుగు నెలలకు ఒకసారి కమిటీ నివేదిక ఇస్తుందని చెప్పిన ధర్మాసనం, ఆఫ్రికా చిరుతలు ఇక్కడ మనగలవని భావిస్తే వాటిని తరలించేందుకు ఎన్టీసీఏకు అనుమతి ఇస్తామని వెల్లడించింది.