రూ.10కి భోజనం పెట్టిన తాత కన్నుమూత

టీనగర్‌, న్యూస్‌టుడే: నిత్యావసరాల ధరలు ఆకాశాన్నంటుతున్న ప్రస్తుత కాలంలో రూ.10కి భోజనం పెట్టిన వృద్ధుడు రాము కన్నుమూశారు. సుమారు 50 సంవత్సరాలుగా రాము హోటల్‌ నిర్వహిస్తున్నారు. స్థానికులు మాట్లాడుతూ... ప్రారంభం నుంచే ఆయన రూపాయి, రూ.2లకే భోజనం పెట్టేవారని తెలిపారు. ఇటీవల కాలంలోనే ఆయన ధరను రూ.10కి పెంచారన్నారు. కొందరు భోజనం చేశాక తోచినంత సాయం అందించేవారని చెప్పారు. వారితోపాటు స్నేహితులు, స్వచ్ఛంద సంస్థలు కూడా అండగా నిలిచాయని తెలిపారు. ఆ మొత్తంతోనే మిగతావారికి కూడా తక్కువ ధరకే భోజనం పెట్టేవారని గుర్తుచేసుకున్నారు. కుటుంబ ఖర్చులకు లేకపోయినా హోటల్‌ నిర్వహణను మాత్రం మానుకోలేదని కొనియాడారు.