TSRTC: హైదరాబాద్‌-విజయవాడ ఈ-గరుడ బస్సులను ప్రారంభించిన టీఎస్‌ఆర్టీసీ

హైదరాబాద్‌: వాయు కాలుష్యాన్ని నివారించే ఎలక్ట్రిక్‌ ఏసీ బస్సులను టీఎస్‌ఆర్టీసీ (తెలంగాణ రాష్ట్ర రోడ్డు రవాణా సంస్థ) ప్రారంభించింది. హైదరాబాద్‌-విజయవాడ రూట్‌లో పరుగులు పెట్టనున్న ‘ఈ-గరుడ’ బస్సులను మియాపూర్‌ క్రాస్‌రోడ్‌ సమీపంలోని పుష్పక్‌ బస్‌ పాయింట్‌ వద్ద రవాణాశాఖ మంత్రి పువ్వాడ అజయ్‌ కుమార్‌, ఆర్టీసీ ఛైర్మన్‌ బాజిరెడ్డి గోవర్థన్‌, ఎండీ సజ్జనార్‌ జెండా ఊపి ప్రారంభించారు.

హైదరాబాద్‌- విజయవాడ మార్గంలో ఇవాళ పది బస్సులను ప్రారంభించగా.. దశలవారీగా 50 ఎలక్ట్రిక్‌ బస్సులను  నడపాలని ఆర్టీసీ నిర్ణయించింది. మిగతా బస్సులను ఈ ఏడాది చివరి నాటికి తీసుకొచ్చేలా సంస్థ ప్రణాళిక రూపొందించింది. ఇవి వస్తే ప్రతి 20 నిమిషాలకు ఒక బస్సు అందుబాటులో ఉంటుందని ఆర్టీసీ చెబుతోంది. హైదరాబాద్‌ నుంచి విజయవాడకు ఈ-గరుడ ఛార్జి రూ.780గా నిర్ణయించారు. హైదరాబాద్‌లో త్వరలో ఎలక్ట్రిక్‌ డబుల్‌ డెక్కర్‌ బస్సులు ప్రారంభిస్తామని ఆర్టీసీ ఎండీ సజ్జనార్‌ తెలిపారు.