Tirumala: తిరుమలను కమ్మేసిన పొగమంచు.. పాపవినాశనం, శ్రీవారి పాదాల మార్గం మూసివేత

తిరుమల: ప్రముఖ ఆధ్యాత్మిక కేంద్రమైన తిరుమల (Tirumala)ను పొగమంచు కమ్మేసింది. శుక్రవారం తెల్లవారుజాము నుంచి పొగమంచు, వర్షంతో తిరుమలలో ఆహ్లాదకర వాతావరణం నెలకొంది. దట్టమైన పొగమంచు కారణంగా ఘాట్‌రోడ్లలో వాహనదారులు తీవ్రంగా ఇబ్బంది పడ్డారు. చలితీవ్రత బాగా పెరిగింది. శ్రీవారిని దర్శించుకుని బయటకు వస్తున్న భక్తులు వర్షంలో తడుస్తూ గదులకు చేరుకునేందుకు ఇబ్బందులు ఎదుర్కొన్నారు. అకస్మాత్తుగా తిరుమలలో రద్దీ కూడా పెరగడంతో భక్తులకు ఇబ్బందులు తప్పడం లేదు.

పొగమంచు, వర్షం నేపథ్యంలో సొంత వాహనాల్లో ఘాట్‌రోడ్డులో ప్రయాణించే వారిని అలిపిరి వద్ద తితిదే (TTD) సిబ్బంది అప్రమత్తం చేస్తున్నారు. ఘాట్‌రోడ్లలో రహదారి మరమ్మతు పనులు జరుగుతున్న ప్రాంతాల్లో అప్రమత్తంగా వెళ్లాలని సూచిస్తున్నారు. పొగమంచు, వర్షం కారణంగా పాపవినాశనం, శ్రీవారి పాదాల మార్గాలను తాత్కాలికంగా తితిదే మూసివేసింది. ఈ మార్గాల్లో వాహనాల రాకపోకలను శుక్రవారం సాయంత్రం నుంచి నిలిపివేశారు.