Vande Bharat Express: గుడ్‌న్యూస్‌.. సికింద్రాబాద్‌- తిరుపతి ‘వందే భారత్‌’లో కోచ్‌లు రెట్టింపునకు ఓకే..

హైదరాబాద్‌: సికింద్రాబాద్‌-తిరుపతి నగరాల మధ్య సేవలందిస్తోన్న వందే భారత్‌ ఎక్స్‌ప్రెస్‌(Vande Bharat Express) రైలుకు ప్రయాణికుల నుంచి విశేష స్పందన లభిస్తోన్న విషయం తెలిసిందే. ప్రస్తుతం ఎనిమిది కోచ్‌లతో నడుస్తోన్న ఈ సెమీ-హైస్పీడ్‌ రైలులో బోగీల సంఖ్యను పెంచాలన్న అభ్యర్థనల నేపథ్యంలో కేంద్ర ప్రభుత్వం కీలక నిర్ణయం తీసుకుంది. తిరుమల భక్తులతో రైలులో రద్దీని దృష్టిలో ఉంచుకొని ఈ రైలులో బోగీలను రెట్టింపు చేసేందుకు అంగీకరించింది. రైలులో ప్రస్తుతం ఉన్న 8 కోచ్‌లను 16కి పెంచేందుకు కేంద్రం అంగీకరించినట్టు కేంద్రమంత్రి కిషన్‌ రెడ్డి(KishanReddy) వెల్లడించారు. ఈ మేరకు ప్రధాని నరేంద్ర మోదీ, రైల్వే మంత్రి అశ్వినీ వైష్ణవ్‌లకు కృతజ్ఞతలు తెలుపుతూ ఆయన ట్వీట్‌ చేశారు. 

సికింద్రాబాద్‌-తిరుపతి వందే భారత్‌ రైలులో 120 నుంచి 130శాతం మేర ఆక్యుపెన్సీ రేషియో నమోదవుతోంది. చాలా మంది ప్రయాణికులు రిజర్వేషన్లు దొరక్క ఈ రైలులో వెళ్లాలనుకున్నా ప్రయాణించలేకపోతున్నారు. ఈ విషయాన్ని ‘ఈనాడు’ ఇటీవల కేంద్రమంత్రి కిషన్‌ రెడ్డి వద్ద ప్రస్తావించగా.. ఆయన దక్షిణ మధ్య రైల్వే జీఎం అరుణ్‌కుమార్‌ జైన్‌ను పిలిచి తిరుపతి వందేభారత్‌ రైలులో బోగీల సంఖ్యను పెంచే విషయంపై ఆరా తీశారు. దీంతో ఈ రైలుకు ఉన్న డిమాండ్‌ను వివరిస్తూ ద.మ.రైల్వే అధికారులు  రైల్వే బోర్డుకు లేఖ రాశారు. ఈ నేపథ్యంలో కసరత్తు ప్రారంభించిన రైల్వే బోర్డు తాజాగా వందేభారత్‌ రైలులో కోచ్‌లను రెట్టింపు చేసేందుకు అంగీకరించడం విశేషం.