పార్లమెంట్ సమావేశాలు కుదించే యోచనలో కేంద్రం!

దిల్లీ: దేశంలో కరోనా ఉద్ధృతి కొనసాగుతున్న వేళ ప్రత్యేకంగా జరుగుతున్న పార్లమెంట్‌ వర్షాకాల సమావేశాలు నిర్దేశిత గడువు కంటే వారం ముందే ముగిసే అవకాశం ఉంది. పలువురు కేంద్ర మంత్రులతో పాటు 30 మంది ఎంపీలు కొవిడ్ బారిన పడినందున కేంద్రం ఈ దిశగా ఆలోచిస్తున్నట్టు పార్లమెంట్‌ అధికారులు తెలిపారు. గడిచిన ఆర్నెళ్ల వ్యవధిలో తొలిసారిగా ఈ నెల 14న సమావేశమైన పార్లమెంట్‌ ఉభయసభలు అక్టోబర్‌ 1వరకు కొనసాగుతాయని తొలుత కేంద్రం ప్రకటించింది.అయితే, నితిన్‌ గడ్కరీ సహా పలువురు కేంద్రమంత్రులు, 30 మంది ఎంపీలు ఈ మహమ్మారి బారినపడటంతో వర్షాకాల సమావేశాలను కుదించాలని కేంద్రం భావిస్తున్నట్టు తెలుస్తోంది.అందుకే బిల్లులను త్వరితగతిన ఆమోదింపజేసుకోవాలని యోచిస్తోంది. ఇప్పటికే వ్యవసాయ సంబంధ బిల్లులను ఆమోదించిన కేంద్రం.. వచ్చే బుధవారం వరకే సమావేశాలు కొనసాగుతాయన్న వాదనలు వినిపిస్తున్న నేపథ్యంలో ఆ లోపు మిగతా అన్ని బిల్లులను ఆమోదింపజేసుకొనేలా వ్యూహ రచన చేస్తోంది. ఇందులో భాగంగా సాయంత్రం 5గంటలకు బీఏసీ సమావేశం జరగనుంది. పార్లమెంట్‌ సమావేశాల కుదింపు అంశంపై చర్చించే అవకాశం ఉంది.