Air India: కాక్‌పిట్‌లోకి స్నేహితురాలు.. పైలట్‌ సస్పెన్షన్‌.. రూ.30 లక్షల జరిమానా!

దిల్లీ: విమానంలో ఓ పైలట్‌ తన స్నేహితురాలిని కాక్‌పిట్‌ (Cockpit) లోకి ఆహ్వానించిన ఘటనలో.. ఎయిర్‌ ఇండియా (Air India)పై పౌర విమానయాన నియంత్రణ సంస్థ (DGCA) కొరడా ఝుళిపించింది. నిబంధనలు ఉల్లంఘించారని పేర్కొంటూ.. ఈ వ్యవహారంలో పైలట్‌పై మూడు నెలల సస్పెన్షన్‌ వేటు వేయడంపాటు సంస్థకు రూ.30 లక్షల జరిమానా విధించింది. ఈ అంశాన్ని నివేదించడంలో జాప్యం జరిగిందంటూ ఎయిర్‌ ఇండియా సీఈఓ క్యాంబెల్‌ విల్సన్‌తో పాటు ఎయిర్‌ ఇండియా భద్రత, రక్షణ- నాణ్యత విభాగాధిపతికి సైతం ఇటీవల డీజీసీఏ.. షోకాజ్‌ నోటీసులు జారీ చేసిన విషయం తెలిసిందే. అంతకుముందు.. ఈ ఘటనపై విచారణ ముగిసేంత వరకు ఆ విమానంలో ఉన్న సిబ్బందిని విధుల నుంచి తప్పించాలని ఎయిర్‌ ఇండియా సంస్థకు సూచించింది. ఈ క్రమంలోనే తాజాగా ఈ మేరకు చర్యలు తీసుకుంది.

ఫిబ్రవరి 27న దుబాయ్‌- దిల్లీ ఎయిర్‌ ఇండియా విమానంలో.. ఓ పైలట్‌ తన స్నేహితురాలిని కాక్‌పిట్‌లోకి తీసుకెళ్లడమే గాక, ప్రయాణ సమయమంతా ఆమెను అక్కడే కూర్చోబెట్టుకున్నాడు. ప్రయాణికుల్లో తన స్నేహితురాలు ఉందని గుర్తించిన పైలట్‌.. విమానం గాల్లోకి ఎగిరిన కొద్దిసేపటికే ఆమెను కాక్‌పిట్‌లోకి ఆహ్వానించాడు. దిల్లీ చేరుకునేంతవరకు అంటే.. దాదాపు 3 గంటలపాటు ఆ మహిళ కాక్‌పిట్‌లోనే ఫస్ట్‌ అబ్జర్వర్‌ సీట్‌లో కూర్చున్నట్లు అధికారులు తెలిపారు. ఈ ఘటనపై క్యాబిన్‌ సభ్యుల్లో ఒకరు డీజీసీఏకు ఫిర్యాదు చేయడంతో విషయం బయటపడింది. తన స్నేహితురాలికి కాక్‌పిట్‌లోనే భోజనం అందజేయాలని, సకల మర్యాదలు చేయాలని విమాన సిబ్బందిని పైలట్‌ ఆదేశించినట్లు సమాచారం. ఇందుకు అభ్యంతరం తెలిపిన సిబ్బందితో పైలట్‌ దురుసుగా ప్రవర్తించినట్లు ఆ ఫిర్యాదులో పేర్కొన్నట్లు తెలిసింది.