యూపీలో ఘోర ప్రమాదం

ట్రక్కును బస్సు ఢీకొనడంతో మంటలు

  20 మందికి పైగా మృతి!

కన్నౌజ్‌: ఉత్తర్‌ప్రదేశ్‌లో ఘోర ప్రమాదం చోటుచేసుకుంది. ఏసీ బస్సు.. ట్రక్కును ఢీకొనడంతో భారీగా మంటలు చెలరేగి, 20 మందికిపైగా ప్రయాణికులు మృతి చెందినట్టు భావిస్తున్నారు. ఉత్తర్‌ప్రదేశ్‌లోని చిలోయి గ్రామంలో శుక్రవారం రాత్రి ఈ దుర్ఘటన చోటుచేసుకుంది. ఇందుకు సంబంధించిన వివరాలను కాన్పూర్‌ ఇన్‌స్పెక్టర్‌ జనరల్‌ మోహిత్‌ అగర్వాల్‌ వెల్లడించారు. ఫరుఖాబాద్‌ నుంచి 45 మంది ప్రయాణికులతో జైపుర్‌ బయల్దేరిన ఏసీ బస్సు... చిలోయి వద్ద ట్రక్కును ఢీకొట్టింది. ఈ ధాటికి మంటలు అంటుకుని క్షణాల్లో వ్యాపించాయి. పోలీసులు 21 మందిని రక్షించి, ఆసుపత్రికి తరలించారు. అయితే 20 మందికిపైగా చనిపోయి ఉండొచ్చని పోలీసులు భావిస్తున్నారు. వాహనాలు బలంగా ఢీకొనడంతో డీజిల్‌ ట్యాంకు పగిలి భారీగా మంటలు విస్తరించి ఉండొచ్చని వారు చెప్పారు. ఈ ఘటన పట్ల ముఖ్యమంత్రి ఆదిత్యనాథ్‌ విచారం వ్యక్తం చేశారు.