Bihar: బిహార్‌ రైల్వేస్టేషన్ల టీవీల్లో ‘నీలి’గోల!

భాగల్‌పుర్‌: బిహార్‌ రాష్ట్రంలోని భాగల్‌పుర్‌ పట్టణ రైల్వేస్టేషనులోని టీవీ తెరపై సోమవారం రాత్రి 10.00 గంటల ప్రాంతంలో ఉన్నపళంగా ప్రత్యక్షమైన అసభ్య సందేశం చూసి ప్రయాణికులు అవాక్కయ్యారు. 5 నుంచి 10 నిమిషాలు ప్రసారమైన ఆ సమాచారాన్ని కొంతమంది తమ సెల్‌ఫోన్లతో చిత్రించగా, మరికొందరు అధికారులకు ఫిర్యాదు చేశారు. దీంతో ఆ ప్రసారాలను వెంటనే నిలిపివేశారు. గత మార్చి నెలలో బిహార్‌ రాజధాని పట్నా రైల్వేస్టేషనులోని టీవీ తెరలపై మూడు నిమిషాలపాటు ఏకంగా నీలిచిత్రమే ప్రసారమైంది. ఈ ఉదంతం మరవకముందే భాగల్‌పుర్‌లో మరో అపశ్రుతి దొర్లింది. వివరాలు సేకరించిన సబ్‌ డివిజనల్‌ అధికారి ధనంజయ్‌కుమార్‌, డీఎస్పీ అజయ్‌కుమార్‌ చౌధరి టీవీ ప్రసారాలపై దర్యాప్తు జరిపి బాధ్యులపై చర్యలు తీసుకొంటామని తెలిపారు.