Indigo: పాక్‌ గగనతలంలోకి ఇండిగో విమానం

ప్రతికూల వాతావరణంతో ఘటన
సురక్షితంగా తిరిగి దేశంలోకి ప్రవేశం

ఇస్లామాబాద్‌: అమృత్‌సర్‌ నుంచి అహ్మదాబాద్‌కు బయలుదేరిన ఓ ఇండిగో విమానం ప్రతికూల వాతావరణం కారణంగా పాకిస్థాన్‌ గగనతలంలోకి ప్రవేశించింది. లాహోర్‌ సమీపంలోని గుజ్రాన్‌వాలా వరకూ దూసుకెళ్లింది. 30 నిమిషాల తరువాత సురక్షితంగా మన గగనతలంలోకి వచ్చేసింది. ఈ మేరకు ఆదివారం విమానయాన సంస్థ వెల్లడించింది. విమాన రాడార్‌ వివరాల ప్రకారం.. భారత విమానం శనివారం రాత్రి 7.30 గంటలకు ఉత్తర లాహోర్‌ ప్రాంతంలోకి ప్రవేశించింది. రాత్రి 8 గంటలకు భారత్‌కు తిరిగివచ్చేసింది. ఈ వ్యవహారంపై అమృత్‌సర్‌ ఏటీసీ టెలిఫోన్‌ ద్వారా పాకిస్థాన్‌తో చక్కటి సమన్వయం సాగించింది. అదేవిధంగా విమాన సిబ్బంది ఆర్‌-టీ ద్వారా నిరంతరాయంగా పాకిస్థాన్‌ ఏటీసీ అధికారులతో సంభాషిస్తూనే ఉన్నారు. చివరికి విమానం శనివారం రాత్రి   8.01 నిమిషాలకు అహ్మదాబాద్‌ విమానాశ్రయంలో సురక్షితంగా దిగింది. సివిల్‌ ఏవియేషన్‌ అథారిటీ(సీఏఏ)కు చెందిన ఓ సీనియర్‌ అధికారి దీనిపై మాట్లాడుతూ.. అంతర్జాతీయంగా ప్రతికూల వాతావరణం సందర్భాల్లో ఇలాంటి ఘటనలు సాధారణంగా జరుగుతుంటాయన్నారు.