పోరాటానికి సన్నద్ధంగా ఉండండి

సైనిక దళాలకు చైనా అధ్యక్షుడి పిలుపు

బీజింగ్‌: చైనా అధ్యక్షుడు జిన్‌పింగ్‌ తన సైనిక బలగాలకు అప్రమత్తత సందేశాన్ని ఇచ్చారు. పోరాట నైపుణ్యాలను మరింత మెరుగుపరచుకొని, అత్యున్నతస్థాయి అప్రమత్తతను కలిగి ఉండాలన్నారు. ఏ క్షణాన యుద్ధం వచ్చినా ఎదుర్కొనేందుకు సిద్ధంగా ఉండాలని సూచించారు. సైనిక బలగాలపై తనకు విస్తృత అధికారాలను కల్పించే కొత్త రక్షణ చట్టం అమల్లోకి వచ్చిన నేపథ్యంలో ఆయన ఈ వ్యాఖ్యలు చేశారు.
చైనా కమ్యూనిస్టు పార్టీతో పాటు కేంద్ర సైనిక కమిషన్‌ (సీఎంసీ)కు జిన్‌పింగ్‌ నాయకత్వం వహిస్తున్నారు. ఈ ఏడాది కమిషన్‌కు సంబంధించిన తొలి ఉత్తర్వుపై ఆయన సంతకం చేసినట్లు అధికారిక మీడియా మంగళవారం పేర్కొంది. చైనా సైన్యం, సాయుధ పోలీసు దళాల శిక్షణకు సంబంధించిన ప్రాధాన్యతలను ఇందులో ప్రస్తావించారు. సోషలిజానికి సంబంధించి జిన్‌పింగ్‌ సిద్ధాంతానికి కట్టుబడాలని సైన్యానికి ఈ ఉత్తర్వు పిలుపునిచ్చింది. వాస్తవ యుద్ధరంగాన్ని పోలి ఉండే పరిస్థితుల్లో శిక్షణ పొందాలని సూచించింది. పోరాట వ్యూహాలపై మరింత పరిశోధన సాగించాలని తెలిపింది. యుద్ధవిన్యాసాలను పెంచాలంది. అధునాతన ఆయుధ సంపత్తిని వినియోగించే నైపుణ్యాన్ని కలిగి ఉండాలంది.