విదేశీ అతిథులు లేకుండానే గణతంత్ర వేడుకలు

దిల్లీ: ఈ ఏడాది గణతంత్ర వేడుకలను విదేశీ దేశాధినేతలు, ప్రభుత్వాధినేతలు లేకుండానే నిర్వహించనున్నట్లు ప్రభుత్వ వర్గాలు బుధవారం వెల్లడించాయి. దేశంలో కరోనా వ్యాప్తి ఉద్ధృతి దృష్ట్యా ఈ నిర్ణయం తీసుకున్నట్లు సమాచారం. విదేశీ అతిథులు లేకుండానే గణతంత్ర వేడుకలు నిర్వహించడం వరుసగా ఇది రెండో ఏడాది కావడం గమనార్హం. మరోవైపు..ఈ నెల 27న వర్చువల్‌ విధానంలో జరగనున్న భారత్‌-మధ్య ఆసియా మొదటి సదస్సుకు భారత ప్రధాని నరేంద్ర మోదీ ఆతిథ్యం ఇవ్వనున్నారు. కజక్‌స్థాన్‌, కిర్గిజ్‌ రిపబ్లిక్‌, తజికిస్థాన్‌, తుర్క్‌మెనిస్థాన్‌, ఉజ్బెకిస్థాన్‌ అధ్యక్షుల భాగస్వామ్యంతో జరగనున్న ఈ సదస్సులో మోదీ ప్రసంగించనున్నట్లు అధికారవర్గాలు వెల్లడించాయి. ఈ సదస్సులో ఆయా దేశాల అధినేతలు పాల్గొననుండటంతో గణతంత్ర వేడుకలకు విదేశీ అతిథిని ఆహ్వానించలేదని తెలుస్తోంది.