ఐరోపాలోలా భారత్‌లోనూ ప్రైవేటు జైళ్లు కట్టాలి: సుప్రీం

దిల్లీ: ఐరోపా తరహాలో భారత్‌లోనూ ప్రైవేటు కారాగారాలను నిర్మించాలని, ఇందుకు దేశంలోని కార్పొరేట్‌ సంస్థలు పూనుకోవాలని సుప్రీంకోర్టు అభిప్రాయపడింది. గురువారం భీమా కోరేగావ్‌ కేసులో నిందితుడు గౌతమ్‌ నవలఖాను ఆరోగ్యకారణాల రీత్యా.. తలోజా జైలు నుంచి ఆస్పత్రికి తరలించాలని సుప్రీంకోర్టు ఆదేశించింది. ఈ సందర్భంగా నవలఖా తరఫు సీనియర్‌ న్యాయవాది కపిల్‌ సిబల్‌ మాట్లాడుతూ.. జైళ్లలో రద్దీ ఎక్కువైపోయిందని, రోగులను చూడటానికి కేవలం ఆయుర్వేద వైద్యులు మాత్రమే అందుబాటులో ఉంటున్నారని పేర్కొన్నారు. దీనిపై జస్టిస్‌ కె.ఎం.జోసెఫ్‌, జస్టిస్‌ హృషికేశ్‌రాయ్‌ల ధర్మాసనం స్పందిస్తూ.. కార్పొరేట్‌ సోషల్‌ రెస్పాన్సిబులిటీ(సీఎస్‌ఆర్‌)లో భాగంగా దేశంలోని బడా సంస్థలు జైళ్లు నిర్మిస్తే బాగుంటుందని వ్యాఖ్యానించింది. ఐరోపాలో ప్రైవేటు కారాగారాలు ఉన్నాయని తెలిపింది.