Manish Sisodia: తన అరెస్టును సవాలు చేస్తూ సుప్రీంకోర్టుకు సిసోదియా

దిల్లీ: మద్యం కుంభకోణం కేసులో తన అరెస్టును, కేంద్రదర్యాప్తు సంస్థ సీబీఐ విచారణ తీరును సవాలు చేస్తూ దిల్లీ ఉపముఖ్యమంత్రి మనీశ్‌ సిసోదియా(Manish Sisodia) మంగళవారం సుప్రీంకోర్టు(Supreme Court)ను ఆశ్రయించారు. ఈ కేసులో ఆదివారం సీబీఐ(CBI) ఆయన్ను అరెస్టు చేసిన సంగతి తెలిసిందే. అలాగే ఐదురోజుల సీబీఐ కస్టడీకి అప్పగిస్తూ దిల్లీ కోర్టు నిన్న ఉత్తర్వులిచ్చింది. ఈ పరిమాణాల నేపథ్యంలో ఆయన సుప్రీం మెట్లెక్కారు. సిసోదియా అభ్యర్థనను అత్యవసర విచారణ నిమిత్తం ప్రధాన న్యాయమూర్తి జస్టిస్ డీవై చంద్రచూడ్ ముందు ప్రస్తావించనున్నట్లు తెలుస్తోంది.

సిసోదియా కస్టడీకి దిల్లీ కోర్టు షరతులు..

* ఐదురోజుల కస్టడీలో భాగంగా సిసోదియా(Manish Sisodia)ను విచారించే స్థలమంతా సీసీటీవీ కవరేజ్ ఉండాలి. దానికి సంబంధించిన ఫుటేజ్‌ను సీబీఐ భద్రపరచాలి. 

* దిల్లీ (Delhi) డిప్యూటీ సీఎంకు ప్రతి 48 గంటలకు ఒకసారి వైద్య పరీక్షలు నిర్వహించాలి.

* సిసోదియా(Manish Sisodia) ప్రతిరోజూ సాయంత్రం 6 నుంచి 7 గంటల మధ్య ఒక అరగంటపాటు తన తరఫు న్యాయవాదులను కలుసుకోవచ్చు. వారిమధ్య జరిగే సంభాషణను దర్యాప్తు సంస్థ అధికారులు వినేందుకు వీలులేదు. 

* ప్రతిరోజూ 15 నిమిషాల పాటు ఆయన సతీమణితో మాట్లాడేందుకు అనుమతి ఉంది. అలాగే వైద్యులు రాసిచ్చిన మందులు వేసుకోవచ్చు.