Devil: ఆ కారణంతోనే నవీన్‌ను దర్శకుడిగా తొలగించా: అభిషేక్‌ నామా

ఇంటర్నెట్‌డెస్క్‌: ‘కల్యాణ్‌ రామ్‌’ (Kalyan Ram) హీరోగా నటించిన ‘డెవిల్‌’ (Devil) చిత్రానికి దర్శకత్వం విషయంలో నెలకొన్న వివాదంపై చిత్ర దర్శకుడు అభిషేక్‌ నామా (Abhishek Nama) స్పందించారు. నవీన్‌ మేడారంను దర్శకత్వ బాధ్యతల నుంచి తొలగించడానికి గల కారణాన్ని తాజాగా ఓ వెబ్‌సైట్‌కు ఇచ్చిన ఇంటర్వ్యూలో వెల్లడించారు. ఈ సినిమా ప్రాజెక్ట్‌ను నవీన్‌ హ్యాండిల్‌ చేయలేకపోయాడని.. అందుకే తాను దర్శకుడిగా బాధ్యతలు స్వీకరించాల్సి వచ్చిందని ఆయన చెప్పారు. ప్రస్తుతం ఈ వ్యాఖ్యలు నెట్టింట వైరల్‌గా మారాయి.

పిరియాడికల్‌ డ్రామాగా ‘డెవిల్‌’ సిద్ధమైంది. సంయుక్త కథానాయిక. అభిషేక్‌ నామా దర్శక - నిర్మాతగా వ్యవహరించారు. డిసెంబర్‌ 29న ఈ చిత్రం ప్రేక్షకుల ముందుకు రానుంది. అయితే ఈ చిత్రాన్ని తానే తెరకెక్కించానని తెలియజేస్తూ నవీన్‌ మేడారం బుధవారం ఓ పోస్ట్‌ పెట్టారు. దాదాపు 105 రోజుల పాటు శ్రమించి సినిమా షూట్‌ పూర్తి చేశాననీ.. తానే దర్శకత్వం వహించినప్పటికీ తనకు ఏమాత్రం క్రెడిట్‌ ఇవ్వకపోవడం బాధగా ఉందని పేర్కొన్నారు. ఈ సినిమా కోసం కల్యాణ్‌రామ్‌ ఎంతో శ్రమించారని చెప్పారు. ఈ చిత్రం తప్పకుండా బ్లాక్‌బస్టర్‌ అవుతుందని తాను నమ్ముతున్నట్లు తెలిపారు. నవీన్‌ చేసిన వ్యాఖ్యల నేపథ్యంలో తాజాగా అభిషేక్‌ నామా స్పందించారు.