Kiara Advani: ‘వార్‌...’కు కియారా?

చిత్రపరిశ్రమలో ఇటీవలి కాలంలో కొందరు నాయికలు యాక్షన్‌ బాట పడుతున్నారు. వరుస సినిమాలతో జోరు మీదున్న నాయిక కియారా అడ్వాణీ (Kiara Advani) కూడా ఈ దారిలోనే ప్రేక్షకులను అలరించడానికి సిద్ధమవుతోంది. తాజాగా ఆమె ‘వార్‌ 2’ (WAR 2)లో నాయికగా ఎంపికైనట్లు సమాచారం. ఈ చిత్రంలో ఎన్టీఆర్‌, బాలీవుడ్‌ కథానాయకుడు హృతిక్‌ రోషన్‌ ప్రధాన పాత్రల్లో నటిస్తున్న సంగతి తెలిసిందే. అయాన్‌ ముఖర్జీ ఈ చిత్రాన్ని తెరకెక్కిస్తున్నారు. మల్టీస్టార్స్‌తో రూపొందుతున్న ఈ సినిమాపై ఇప్పటికే ప్రేక్షకుల్లో భారీ అంచనాలు ఉన్నాయి. ఈ సినిమాలో కియారా.. హృతిక్‌ సరసన నటించనున్నట్లు సమాచారం. ఎన్టీఆర్‌ ప్రతినాయక ఛాయలున్న పాత్రలో నటించనున్నారని ప్రచారం జరుగుతున్న నేపథ్యంలో జోడీగా ఎవరు నటిస్తారో చూడాలి మరి. ఈ స్పై థ్రిల్లర్‌ చిత్రం ఈ ఏడాది సెట్స్‌పైకి వెళ్లనుంది. ప్రస్తుతం ‘సత్య ప్రేమ్‌ కీ కథా’ చిత్రంలో నటిస్తుంది కియార.