Love Today: ఈ సినిమాకి ప్రేక్షకులే హీరోలు..

ప్రదీప్‌ రంగనాథన్‌ (Pradeep Ranganathan) హీరోగా నటిస్తూ.. స్వీయ దర్శకత్వంలో తెరకెక్కించిన తమిళ చిత్రం ‘లవ్‌ టుడే’ (Love Today). ఈ సినిమాని అదే పేరుతో తెలుగు ప్రేక్షకుల ముందుకు తీసుకొస్తున్నారు నిర్మాత దిల్‌రాజు. ఇది నవంబర్‌ 25న విడుదల కానుంది. ఈ నేపథ్యంలో ఇటీవల హైదరాబాద్‌లో చిత్ర ట్రైలర్‌, పాటల్ని విడుదల చేశారు. కార్యక్రమంలో వంశీ పైడిపల్లి, అనిల్‌ రావిపూడి, రాధికా శరత్‌ కుమార్‌ బిగ్‌ సీడీని ఆవిష్కరించారు. అనంతరం చిత్ర హీరో, దర్శకుడు ప్రదీప్‌ మాట్లాడుతూ.. ‘‘మూడేళ్ల కష్టం ఈ సినిమా. తమిళంలో మేము ఊహించిన దాని కన్నా పెద్ద విజయాన్ని అందుకున్నాం. ఇప్పుడీ చిత్రాన్ని తెలుగులో దిల్‌రాజు విడుదల చేయడం ఆనందంగా ఉంది. యువన్‌ మంచి సంగీతమందించారు. సత్యరాజ్‌, రాధికా, యోగిబాబు తమ పాత్రల్లో మెప్పిస్తారు. ఈ చిత్రంలో నేను హీరో కాదు. ప్రేక్షకులే హీరో. తప్పకుండా దీంతో ప్రతి ఒక్కరూ కనెక్ట్‌ అవుతారు’’ అన్నారు. ‘‘ఇది తమిళనాడులో చిన్న సినిమాగా విడుదలై.. రూ.50 కోట్లకు పైగానే వసూళ్లు రాబట్టింది. దీన్ని రీమేక్‌ చేస్తే ఆ మ్యాజిక్‌ రాదనే ఉద్దేశంతో అనువదించాలని నిర్ణయించుకున్నా. సినిమా చూసిన వారంతా ఇందులోని ఏదోక పాత్రతో కనెక్ట్‌ అవుతారు’’ అన్నారు నిర్మాత దిల్‌రాజు. ఈ వేడుకలో ఇవాన, రవీనా, యువన్‌ శంకర్‌రాజా తదితరులు పాల్గొన్నారు.