Malli Pelli: నరేశ్‌ - పవిత్రా లోకేశ్‌ల ‘మళ్లీ పెళ్లి’.. రిలీజ్‌ డేట్‌ ఫిక్స్‌

ఇంటర్నెట్‌ డెస్క్‌: ప్రముఖ నటుడు నరేశ్‌ (Naresh) తన వ్యక్తిగత జీవితంలో చోటుచేసుకున్న సంఘటన ఆధారంగా నటిస్తూ నిర్మించిన చిత్రం ‘మళ్లీ పెళ్లి’ (Malli Pelli). పవిత్రా లోకేశ్‌ (Pavitra Lokesh), వనితా విజయ్‌కుమార్‌ కీలక పాత్రలు పోషించారు. ఎం. ఎస్ రాజు దర్శకత్వం వహించారు. ఈ సినిమా విడుదల తేదీని బుధవారం ఖరారు చేశారు. మే 26న ప్రేక్షకుల ముందుకు తీసుకొస్తున్నట్టు సోషల్‌ మీడియా వేదికగా ప్రకటించారు. ఈ మేరకు పోస్టర్‌ విడుదల చేశారు. నరేశ్‌, తన రెండో భార్య రమ్య రఘుపతి మధ్య విభేదాలు తలెత్తడం, ఆయన పవిత్రతో చనువుగా ఉండడం.. తెలిసిన విషయమే. ఈ పరిణామాల నేపథ్యంలో రూపొందిన సినిమాకావడంలో సినీ అభిమానుల్లో ఆసక్తి నెలకొంది. వారిద్దరు పెళ్లి చేసుకుంటారనే వార్తలు కొన్ని రోజుల క్రితం నెట్టింట హాట్‌ టాపిక్‌గా మారిన సంగతి తెలిసిందే. వాటిపై ఓ సందర్భంలో స్పందించిన నరేశ్‌ ‘ఓపిక పట్టండి. త్వరలోనే అన్ని వివరాలు చెబుతా’ అని తెలిపారు.