NTR: గోవా తీరం ‘దేవర’ గీతం

‘దేవర’గా థియేటర్లలో సందడి చేయనున్నారు ఎన్టీఆర్‌. ఆయన కథానాయకుడిగా నటిస్తున్న ఈ పాన్‌ ఇండియా చిత్రాన్ని కొరటాల శివ రూపొందిస్తున్నారు. మిక్కిలినేని సుధాకర్‌, హరికృష్ణ.కె సంయుక్తంగా నిర్మిస్తున్నారు. జాన్వీ కపూర్‌ కథానాయిక. కల్యాణ్‌ రామ్‌ సమర్పిస్తున్నారు. సైఫ్‌ అలీ ఖాన్‌ ప్రతినాయకుడిగా నటిస్తున్నారు. ఈ సినిమా కొత్త షెడ్యూల్‌ గోవాలో ప్రారంభమైంది. ఈ సందర్భంగా శుక్రవారం ఈ చిత్ర సెట్స్‌ నుంచి ఓ వర్కింగ్‌ స్టిల్‌ పంచుకున్నారు. అందులో ఎన్టీఆర్‌ మాస్‌ లుక్‌లో మునుపెన్నడూ చూడని విధంగా కనిపించారు. ప్రస్తుతం తారక్‌పై ఓ మాంటేజ్‌ గీతాన్ని చిత్రీకరిస్తున్నట్లు చిత్ర వర్గాలు తెలిపాయి. దీనికి రాజు సుందరం నృత్యరీతులు అందిస్తున్నారు. తీరం నేపథ్యంలో సాగే ఓ ఆసక్తికర మాస్‌ యాక్షన్‌ కథాంశంతో ఈ చిత్రం తెరకెక్కుతోంది. ఈ సినిమా రెండు భాగాలుగా ప్రేక్షకుల ముందుకు రానుండగా.. తొలి భాగం ‘దేవర: పార్ట్‌ 1’ పేరుతో అక్టోబరు 10న ప్రపంచవ్యాప్తంగా విడుదల కానుంది. ఈ సినిమాకి అనిరుధ్‌ సంగీతమందిస్తుండగా.. రత్నవేలు ఛాయాగ్రాహకుడిగా వ్యవహరిస్తున్నారు.