Paagal: ఆ పది నిమిషాలు థియేటర్లలో ఏమవుతుందో చూడండి: విశ్వక్‌ సేన్‌

ఇంటర్నెట్‌ డెస్క్‌: ‘ఈ నగరానికి ఏమైంది’, ‘ఫలక్‌నుమా దాస్‌’ చిత్రాలతో  మంచి పేరు తెచ్చుకున్న యువ కథానాయకుడు విశ్వక్‌ సేన్‌. తొలిసారి ‘పాగల్‌’ అనే పూర్తిస్థాయి ప్రేమకథా చిత్రంలో నటించాడు. నరేశ్‌ దర్శకత్వం వహించిన ఈ చిత్రం ఆగస్టు 14న ప్రేక్షకుల ముందుకు రానుంది. ఈ నేపథ్యంలో వ్యాఖ్యాత లాస్యతో ముచ్చటించాడు విశ్వక్‌. ఆ విశేషాలివీ...

* పాగల్‌.. చాలామందికి ఊతపదం. అలాంటిది సినిమా పేరే ‘పాగల్‌’ అని పెట్టారు?

విశ్వక్‌: అప్పట్లో ‘ఇడియట్‌’లా ఇదీ అంతే. కొన్ని సినిమాలు వస్తుంటాయి.. హిట్‌ అవుతాయి.. కొన్నాళ్లకి ఆ కథ గుర్తుండదు. కానీ,  ‘పాగల్‌’ అలా కాదు. ఈ చిత్రంలోని పాత్రలు ఎప్పటికీ గుర్తుండిపోతాయి.

* సినిమాలో 1600 మంది అమ్మాయికి లవ్‌ ప్రపోజ్‌ చేశారు కదా. నిజ జీవితంలో ఎంతమందికి చేశారు?

విశ్వక్‌: రియల్‌ లైఫ్‌లో నలుగురికి ప్రపోజ్‌ చేశాను. ఒక్కరు మాత్రమే అంగీకరించారు.

* మీ బెస్ట్‌ ఫ్రెండ్స్‌లో పాగల్‌ ఫ్రెండ్‌ ఎవరు?

విశ్వక్‌: గోపాల్‌ అని ఓ వ్యక్తి ఉంటాడు. ఆయన కొంచెం పాగల్‌ (నవ్వుతూ).

* ఈ సినిమాలోని టైటిల్‌ సాంగ్‌కి మంచి స్పందన వచ్చింది. మరి గూగుల్‌లో మీరు ఎక్కువగా దేని గురించి వెతుకుతారు?

విశ్వక్‌: సినిమాల గురించే ఎక్కువగా వెతుకుతుంటా. సినిమాల్లోంచి బయటకి తీస్తే నేను దేనికీ పనికిరాను.

* ఈ చిత్రంలో భూమిక పాత్ర ఎలా ఉంటుంది?

విశ్వక్‌: భూమిక ఈ సినిమాలో నాకు తల్లిగా నటించారు. ప్రతి ఒక్కరినీ ఈ పాత్ర కట్టిపడేస్తుంది.

* ‘పాగల్‌’ గురించి ప్రేక్షకులకి తెలియనివి ఇంకా ఏమైనా చెప్తారా?

విశ్వక్‌: తెలియంది అంటే.. కడుపుబ్బా నవ్వించే చిత్రమిది. కుటుంబంతో కలిసి చూసే సినిమా. 2.30గంటలు అప్పుడే అయిపోయిందా అనిపించేలా చేస్తా. యాక్షన్ ఎపిసోడ్‌ 10నిమిషాలు ఉంటుంది. అప్పుడు థియేటర్లలో ఏమవుతుందో మీరే చూస్తారు.