Chiranjeevi: అభిమానికి అండగా నిలిచిన చిరంజీవి

హైదరాబాద్‌: అగ్రకథానాయకుడు, మెగాస్టార్‌ చిరంజీవి ఓ అభిమానికి అండగా నిలిచారు. విశాఖపట్నానికి చెందిన వెంకట్‌ అనే వ్యక్తి చిరంజీవికి వీరాభిమాని. గత కొంతకాలంగా ఆయన అనారోగ్య సమస్యలతో ఇబ్బందిపడుతున్నారు. ఈ క్రమంలోనే తన ఆరోగ్య పరిస్థితి గురించి తెలియజేస్తూ.. చిరంజీవిని కలవాలనుకుంటున్నానని ఇటీవల వెంకట్‌ ఓ ట్వీట్‌ పెట్టారు. ఈ విషయం తెలుసుకున్న చిరంజీవి.. సొంత ఖర్చులతో వెంకట్‌ దంపతులను హైదరాబాద్‌కు రప్పించారు. ఆదివారం ఉదయం తన నివాసంలోనే చిరంజీవి వాళ్లను కలిసి మాట్లాడారు. వెంకట్‌ ఆరోగ్య, ఆర్థిక పరిస్థితుల గురించి తెలుసుకున్న చిరు.. వైద్యానికి అవసరమైన ఖర్చు మొత్తం తానే పెట్టుకుంటానని మాటిచ్చారు. ఈ మేరకు హైదరాబాద్‌, విశాఖపట్నంలోని పలువురు వైద్యులతోనూ చర్చించారు.