LoveStories: ఎట్టకేలకు ఒకటి పూర్తి చేశారు.. మరొకటి వీడియో షేర్‌ చేశారు..!

హైదరాబాద్‌: సాధారణంగా తెలుగు చిత్రపరిశ్రమలో ప్రేమకథలకు కొదవే లేదు. ఇప్పుడు అదే కాన్సెప్ట్‌తో టీటౌన్‌లో రెండు క్రేజీ ప్రాజెక్ట్‌లు సిద్ధమవుతున్న విషయం తెలిసిందే. అందులో ఒకటి పాన్‌ ఇండియా స్టార్‌ ప్రభాస్‌ కథానాయకుడిగా తెరకెక్కుతోన్న ‘రాధేశ్యామ్‌’. మరొకటి శర్వానంద్‌-సిద్దార్థ్‌ ప్రధాన పాత్రల్లో నటిస్తున్న ‘మహాసముద్రం’. గురువారం ఈ రెండు చిత్రాలకు సంబంధించిన సరికొత్త అప్‌డేట్స్‌ బయటకు వచ్చాయి.

ఎట్టకేలకు గుమ్మడికాయ కొట్టారు..!

ప్రభాస్‌ కథానాయకుడిగా కె.రాధాకృష్ణకుమార్‌ దర్శకత్వంలో తెరకెక్కుతోన్న వింటేజ్‌ ప్రేమకథా చిత్రం ‘రాధేశ్యామ్‌’. పూజాహెగ్డే కథానాయిక. #Prabhas20గా రూపుదిద్దుకుంటోన్న ఈ ప్రాజెక్ట్‌ను 2018లోనే ప్రకటించారు. 2019లో ‘సాహో’ విడుదలైన తర్వాత నుంచి ప్రభాస్‌ ఈ ప్రాజెక్ట్‌ పనుల్లోనే బిజీగా ఉంటున్నారు. ఇటలీలో భారీ సెట్‌ క్రియేట్‌ చేసి ప్రధాన సన్నివేశాల షూట్‌ అక్కడే పూర్తి చేశారు. చిత్రీకరణ చివరిదశకు వచ్చిన సమయంలో కరోనా కారణంగా షూటింగ్‌ వాయిదా పడటం జరిగింది. ఈ క్రమంలోనే ఇటీవల హైదరాబాద్‌లో ‘రాధేశ్యామ్‌’ షూటింగ్ పునఃప్రారంభించి చివరి షెడ్యూల్‌ను విజయవంతంగా గురువారంతో పూర్తి చేశారు. ఈ విషయాన్ని తెలియజేస్తూ ‘రాధేశ్యామ్‌’ టీమ్‌ కొన్ని ఫొటోలు షేర్‌ చేసింది. త్వరలోనే పోస్ట్‌ ప్రొడెక్షన్‌ పనులు పూర్తి చేసుకుని ఈ ప్రేమకథా చిత్రం ప్రేక్షకుల ముందుకు రానుంది.

పోస్టర్‌ కాదు ఈ సారి ఏకంగా మోషన్‌ పోస్టరే..!

శర్వానంద్‌, సిద్దార్థ్‌ మల్టీస్టారర్‌గా తెరకెక్కుతోన్న ఇంటెన్స్‌ ప్రేమకథా చిత్రం ‘మహాసముద్రం’. ‘ఆర్‌ఎక్స్‌ 100’ ఫేమ్‌ అజయ్‌ భూపతి దర్శకత్వంలో ఈ సినిమా సిద్ధమవుతోంది. ఆదితిరావు హైదరీ, అను ఇమ్మాన్యుయేల్‌ కథానాయికలు. జగపతిబాబు, రావు రమేశ్‌ కీలకపాత్రలు పోషించారు. ఏకే ఎంటర్‌టైన్‌మెంట్స్‌ పతాకంపై రూపుదిద్దుకుంటోన్న ఈ సినిమాకు సంబంధించి ఇప్పటి వరకూ పలు పోస్టర్లను చిత్రబృందం షేర్ చేసింది. కాగా, తాజాగా గురువారం ఉదయం ఈ సినిమా మోషన్‌ పోస్టర్‌ను అభిమానులతో పంచుకుంది. సిద్దార్థ్‌, శర్వానంద్‌ల లుక్‌లు తెలియజేసే విధంగా సిద్ధమైన ఈ వీడియో ప్రతి ఒక్కర్నీ ఆకట్టుకుంటోంది.