ChandraBabu: డబ్బు, భూమి కాదు.. ప్రజలే నా ఆస్తి: చంద్రబాబు

బనగానపల్లె: పేదవాళ్లను ఆర్థికంగాపైకి తీసుకొచ్చి.. వాళ్లను ధనికులను చేయాలని తెదేపా అధినేత చంద్రబాబు అన్నారు. నంద్యాల జిల్లా బనగానపల్లెలో నిర్వహించిన ‘మహిళలతో ప్రజావేదిక’ కార్యక్రమంలో ఆయన మాట్లాడారు. తెదేపా అధికారంలోకి వచ్చాక విద్యుత్‌ ఛార్జీలు పెంచబోమని.. సౌర, పవన విద్యుత్‌ను తీసుకొస్తామని చెప్పారు.

‘‘ధనికులు ఎక్కువవుతున్నారు. పేదవాళ్లు మాత్రం బాగుపడట్లేదు. అందుకే ప్రజలు, ప్రభుత్వం, ప్రైవేటు భాగస్వామ్యంతో కొత్త కార్యక్రమానికి శ్రీకారం చుట్టాం. పేదవాళ్లందరినీ భాగస్వాములను చేయడంపై ప్రభుత్వం దృష్టిపెట్టాలి. ప్రజల ద్వారా సంపద సృష్టించి వారిని ధనికులను చేయాలి. అనేక ఆలోచనలు చేసి అభివృద్ధికి నాంది పలకాలి. సమర్థత పెంచడానికి, ప్రైవేటు పెట్టుబడులు తీసుకురావడానికే ఆర్థిక సంస్కరణలు వచ్చాయి. డబ్బు, భూమి కాదు.. ప్రజలే నా ఆస్తి’’ అని చంద్రబాబు అన్నారు.