AAP-Congress: ఆర్డినెన్స్‌పై పోరు.. ఆమ్‌ఆద్మీకి కాంగ్రెస్‌ మద్దతిచ్చేనా?

దిల్లీ: దేశ రాజధాని దిల్లీ (Delhi)లో ప్రభుత్వ అధికారుల బదిలీలు, నియామకాల విషయంలో కేంద్ర ప్రభుత్వం తీసుకొచ్చిన ఆర్డినెన్స్‌ (Ordinance)పై ఆమ్‌ఆద్మీ పార్టీకి మద్దతివ్వాలా? వద్దా? అనే అంశంపై కాంగ్రెస్‌ (Congress) మల్లగుల్లాలు పడుతోంది. ఈ మేరకు దిల్లీ, పంజాబ్‌ కాంగ్రెస్‌ నేతలతో జాతీయ అధ్యక్షుడు మల్లికార్జున ఖర్గే, అగ్రనేత రాహుల్‌ గాంధీ కీలక భేటీ నిర్వహించారు. వారి అభిప్రాయాలను తెలుసుకున్నారు. మెజార్టీ నాయకులు మద్దతివ్వకూడదనే చెప్పినట్లు తెలుస్తోంది. ఈ నేపథ్యంలో కాంగ్రెస్‌ నిర్ణయం ఎలా ఉంటుందన్న దానిపై ఆసక్తి నెలకొంది.

కేంద్రం తీసుకొచ్చిన ఆర్డినెన్స్‌ను వ్యతిరేకిస్తూ ఆమ్‌ఆద్మీ పార్టీ పోరును ఉద్ధృతం చేసిన సంగతి తెలిసిందే. ఈ మేరకు వివిధ రాష్ట్రాల ముఖ్యమంత్రులు, కీలక పార్టీ నేతలతో దీల్లీ సీఎం కేజ్రీవాల్ మంతనాలు జరుపుతున్నారు. ఈ క్రమంలోనే కాంగ్రెస్‌ మద్దతును కూడా కోరినట్లు తెలుస్తోంది. దీనిపై చర్చించేందుకు మల్లికార్జున ఖర్గే, రాహుల్‌ గాంధీకి ఫోన్‌ చేసి సమయం కోరినట్లు సమాచారం. అయితే, పార్టీ నాయకులతో చర్చించిన తర్వాత తమ నిర్ణయం వెల్లడిస్తానని ఖర్గే సమాధానమిచ్చినట్లు పార్టీ వర్గాలు చెబుతున్నాయి. ఈ నేపథ్యంలోనే తాజా భేటీ జరిగినట్లు తెలుస్తోంది.

కేజ్రీవాల్‌కు మద్దతివ్వడం వల్ల పార్టీకి ఎలాంటి ప్రయోజనం ఉండబోదని, అతడు దిల్లీ, పంజాబ్‌లోనే కాకుండా ఇతర రాష్ట్రాల్లోనూ కాంగ్రెస్‌ను దెబ్బతీశారని సమావేశం సందర్భంగా పలువును నేతలు అభిప్రాయపడినట్లు సమాచారం. కేజ్రీవాల్‌.. భాజపాకి బీ-టీమ్‌ అనీ, ఆ పార్టీకి మద్దతిస్తే.. భాజపాకి ఇచ్చినట్లేనన్న అభిప్రాయం వ్యక్తమైనట్లు తెలుస్తోంది. ఒకవేళ కాంగ్రెస్‌ అధిష్ఠానం దీనిని పరిగణనలోకి తీసుకుంటే.. ఆర్డినెన్స్‌ విషయంలో ఆప్‌నకు సహకరించే అవకాశాలు కనిపించడం లేదు. కానీ, ఇతర రాష్ట్రాల నేతలతోనూ చర్చించిన తర్వాత దీనిపై కాంగ్రెస్‌ ఓ నిర్ణయానికి వచ్చే అవకాశం ఉంది.

సమావేశం అనంతరం పంజాబ్‌ కాంగ్రెస్‌ అధ్యక్షుడు అమరీందర్‌ సింగ్ రాజా మాట్లాడుతూ.. తమ అభిప్రాయాలను పార్టీ హై కమాండ్‌ ముందు ఉంచామని, నిర్ణయాన్ని మాత్రం అధ్యక్షుడు ఖర్గేకి వదిలేశామని చెప్పారు. ఈ సమావేశం అంతర్గత విషయాలకు సంబంధించిందని, పార్టీ అధ్యక్షుడు లేదా రాహుల్‌ గాంధీ మాత్రమే వివరాలను వెల్లడిస్తారని పంజాబ్‌ కీలక నేత నవజ్యోత్‌ సింగ్‌ సిద్ధూ పేర్కొన్నారు. భారత రాజ్యాంగాన్ని ఓ పవిత్ర గ్రంథంగా అభివర్ణించిన సిద్ధూ.. దానిని స్ఫూర్తిగా తీసుకున్నట్లు చెప్పారు. కానీ, ప్రస్తుతం రాజ్యాంగ విలువలు అధోగతి పాలయ్యాయని గట్టిగా నమ్ముతున్నట్లు చెప్పారు.

మరోవైపు భాజపాకి వ్యతిరేకంగా విపక్షపార్టీలన్నీ కూటమిగా ఏర్పడేందుకు ప్రయత్నాలు ముమ్మరంగా సాగుతున్నాయి. ఈ క్రమంలోనే పశ్చిమబెంగాల్‌ ముఖ్యమంత్రి మమతా బెనర్జీ, ఎన్సీపీ అధినేత శరద్‌పవార్‌, ఒడిశా ముఖ్యమంత్రి నవీన్‌పట్నాయక్‌తో అర్వింద్‌ కేజ్రీవాల్‌ పలుదఫాలు భేటీ అయ్యారు. మరోవైపు బిహార్‌ ముఖ్యమంత్రి నీతీశ్‌ కుమార్‌.. కాంగ్రెస్‌ జాతీయ అధ్యక్షుడు ఖర్గే, అగ్రనేత రాహుల్‌ గాంధీతో ప్రత్యేకంగా సమావేశమయ్యారు. ఈ నేపథ్యంలో భవిష్యత్‌ అవసరాలను దృష్టిలో ఉంచుకొని.. ఆర్డినెన్స్‌ విషయంలో కేజ్రీవాల్‌కు మద్దతివ్వాలా?వద్దా? అనే అంశంపై కాంగ్రెస్‌ ఓ నిర్ణయానికి రావాల్సి ఉంది.