Jaggareddy: ఆ పిచ్చితోనే కాంగ్రెస్‌లో కొనసాగుతున్నా: జగ్గారెడ్డి

హైదరాబాద్: రాహుల్‌ గాంధీ త్యాగాల కుటుంబమంటే తనకు చాలా ఇష్టమని, ఆ పిచ్చితోనే తాను కాంగ్రెస్‌లో కొనసాగుతున్నట్టు సంగారెడ్డి ఎమ్మెల్యే జగ్గారెడ్డి తెలిపారు. బుధవారం ఆయన మీడియాతో మాట్లాడుతూ... చాలా రోజులుగా తన మనసులో ఆవేదనలు మసులుతున్నాయని, వాటిలో ఒక మాటను తప్పనిసరి పరిస్థితుల్లో బయటకు చెబుతున్నట్టు పేర్కొన్నారు. బయటకు చెబితే ఏమవుతుందో.. చెప్పకపోతే ఏం జరుగుతుందోనన్న ఆందోళన గత కొన్ని రోజులుగా ఉందని తెలిపారు. 

తాను గాంధీ భవన్‌లో కూర్చొని ఆనందించే పరిస్థితి లేకుండా పోయిందని, తప్పనిసరి పరిస్థితుల్లో మీడియా ద్వారా ఈ ఒక్క మాట కాంగ్రెస్‌ నాయకులు, కార్యకర్తలకు తెలియజేస్తున్నట్టు వివరించారు. గడచిన ఐదు నెలలుగా తాను రాజకీయంగా గాంధీభవన్‌కు రాలేని పరిస్థితి ఏర్పడిందని ఆందోళన వ్యక్తం చేశారు. పరిస్థితులు అనుకూలంగా ఉంటే.. గాంధీభవన్‌లో కూర్చొని తనకున్న సమస్యలను మర్చిపోయేవాడినని పేర్కొన్నారు. ఇవాళ అలాంటి పరిస్థితి లేకుండా పోయిందని జగ్గారెడ్డి తెలిపారు.