Rajasingh: ఎమ్మెల్యే రాజాసింగ్‌పై కేసు నమోదుకు ఈసీ ఆదేశం

హైదరాబాద: గోషామహల్‌ భాజపా ఎమ్మెల్యే రాజాసింగ్‌పై ఎఫ్ఐఆర్‌ నమోదు చేయాలని కేంద్ర ఎన్నికల సంఘం (ఈసీ) ఆదేశించింది. ఈమేరకు రాష్ట్ర ముఖ్య ఎన్నికల అధికారికి ఈసీ ఆదేశాలు జారీ చేసింది. ఎన్నికల ప్రచారం, మీడియాతో మాట్లాడటాన్ని కూడా ఈసీ నిషేధించింది. నోటీసుకు స్పందన లేకపోవడంతో రాజాసింగ్‌పై ఈసీ ఆగ్రహం వ్యక్తం చేసింది. ఉత్తర్‌ప్రదేశ్‌లో ఎన్నికల నేపథ్యంలో అక్కడి ఓటర్లను ఉద్దేశించి రాజాసింగ్‌ ఇటీవల వీడియో విడుదల చేశారు. యూపీ ఎన్నికల్లో హిందువులంతా ఏకం కావాలని పిలుపునిచ్చారు. ఎన్నికల తర్వాత యోగికి ఓటు వేయని వారిని గుర్తిస్తామని హెచ్చరించారు. భాజపాకు ఓటువేయని వారి ఇళ్లకు బుల్డోజర్లను పంపిస్తామన్నారు. దీనిపై రాజాసింగ్‌కు నోటీసులు జారీ చేసిన ఈసీ.. 24 గంటల్లో వివరణ ఇవ్వాలని ఆదేశించింది. రాజాసింగ్‌ నుంచి స్పందన లేకపోవడంతో ఈసీ చర్యలు చేపట్టింది.