Sonu Sood: సోనూసూద్‌పై ఎన్నికల సంఘం ఆంక్షలు.. కారణమిదే

చండీగఢ్‌: పంజాబ్‌లో నేడు అసెంబ్లీ ఎన్నికల పోలింగ్‌ ప్రక్రియ కొనసాగుతోన్న విషయం తెలిసిందే. ఈ క్రమంలోనే ఓటర్లను ప్రభావితం చేస్తున్నారనే ఫిర్యాదుల మేరకు.. బాలీవుడ్ నటుడు సోనూసూద్‌ కదలికలను ఎన్నికల సంఘం కట్టడి చేసింది. ఇక్కడి మోగాలోని పోలింగ్‌ కేంద్రాలను సందర్శించకుండా.. ఆయనపై నిషేధం విధించింది. ఆయన సోదరి మాళవిక సూద్‌ కాంగ్రెస్‌ తరఫున మోగా నుంచి పోటీ చేస్తున్న విషయం తెలిసిందే. ఈ క్రమంలోనే.. పోలింగ్‌ కేంద్రాలను సందర్శిస్తూ ఓటర్లను ప్రభావితం చేసేందుకు ప్రయత్నిస్తున్నారని శిరోమణి అకాలీదళ్‌ నేతలు ఆరోపించారు. ఈ మేరకు ఎన్నికల సంఘానికి ఫిర్యాదు చేశారు. దీంతో పోలింగ్‌ కేంద్రాలకు వెళ్లకుండా అడ్డుకునేందుకు ఈసీఐ ఆయన కారును స్వాధీనం చేసుకుంది.

అయితే.. సోనూసూద్‌ ఈ ఆరోపణలను ఖండించారు. ‘నేను స్థానికుడిని. ఒక పార్టీ అభ్యర్థికి ఓటేయమని ఎవరినీ అడగలేదు. పోలింగ్ కేంద్రాల బయట ఏర్పాటు చేసిన కాంగ్రెస్ శిబిరాలను సందర్శిస్తున్నా’ అని తెలిపినట్లు ఓ వార్తాసంస్థ పేర్కొంది. జిల్లా మేజిస్ట్రేట్ హరీష్ నయ్యర్ సైతం ఈ వ్యవహారంపై మోగా ఎస్ఎస్పీని నివేదిక కోరారు. సోనూసూద్ పోలింగ్‌ కేంద్రాలను సందర్శించడాన్ని కొన్ని రాజకీయ పార్టీలు అభ్యంతరకరంగా భావించాయని చెప్పారు. మరోవైపు.. మోగాలోని ఇతర పార్టీల అభ్యర్థులు ఓట్ల కొనుగోలుకు యత్నిస్తున్నారని సోనూసూద్‌ ఆరోపించారు. ఎన్నికల కమిషన్‌ వెంటనే చర్యలు తీసుకోవాలంటూ ఆదివారం ట్వీట్‌ చేశారు. ఇదిలా ఉండగా.. ఎలక్షన్‌కు ముందు కేంద్ర ఎన్నికల సంఘం ఆయన్ను పంజాబ్‌ రాష్ట్ర ఎన్నికల ఐకాన్‌గా నియమించిన విషయం తెలిసిందే.