T20 jersey: టీ20 ప్రపంచకప్‌.. టీమ్‌ఇండియా జెర్సీ ధరెంతో తెలుసా?

T20 jersey | ఇంటర్నెట్‌ డెస్క్‌: అభిమానుల ఎదురుచూపులకు తెరదించుతూ.. టీ20 ప్రపంచకప్‌ (T20 World Cup)  కోసం టీమ్‌ఇండియా (Team India) అధికారిక టీ20 జెర్సీని (T20 jersey) బీసీసీఐ సోమవారం ఆవిష్కరించింది. ప్రముఖ స్పోర్ట్స్‌వేర్‌ బ్రాండ్‌, కిట్‌ స్పాన్సర్‌ అడిడాస్‌ (Adidas) దీన్ని రూపొందించింది. మంగళవారం నుంచి ఈ జెర్సీలు దేశవ్యాప్తంగా తమ ఆఫ్‌లైన్‌, ఆన్‌లైన్‌ స్టోర్లలో అందుబాటులోకి వచ్చినట్లు కంపెనీ తాజాగా వెల్లడించింది.

రెండు ఎడిషన్లలో ఈ జెర్సీలను తీసుకొచ్చారు. ప్లేయర్స్‌ ఎడిషన్‌ ధర రూ.5,999గా నిర్ణయించారు. ఇక ఫ్యాన్స్‌ ఎడిషన్‌ ధర రూ.999గా ఉంది. అయితే, ఈ ధరలపై నెటిజన్ల నుంచి మిశ్రమ స్పందనలు వస్తున్నాయి. కొందరు జెర్సీలను దక్కించుకోవడం కోసం ఎదురుచూస్తున్నామని పోస్టులు చేస్తుండగా.. మరికొందరేమో రేటు చాలా ఎక్కువే అని పెదవి విరుస్తున్నారు. ఈ ధర కంటే కొన్ని మార్గాల్లో విమాన టికెట్‌ ధరే తక్కువ అంటూ కామెంట్లు చేస్తున్నారు.

రోహిత్‌ శర్మను వరల్డ్ కప్‌ ట్రోఫీతో చూడాలని ఉంది: యువరాజ్‌ సింగ్

ఈ జెర్సీని నిన్న ప్రత్యేకంగా ఆవిష్కరించారు. హెలికాప్టర్‌ సాయంతో జెర్సీని ప్రదర్శిస్తుంటే.. రోహిత్‌ శర్మ, రవీంద్ర జడేజా, కుల్దీప్‌ యాదవ్‌ మైదానం నుంచి ఆసక్తికరంగా వీక్షిస్తున్నట్లు అడిడాస్‌ ఓ వీడియోను విడుదల చేసింది. ఈ కొత్త జెర్సీ నీలం, కాషాయం రంగుల్లో ఉంది. ‘వి’ షేప్‌ నెక్‌ ఉంది. ఈ కలర్‌ కాంబినేషన్‌పై కొందరు అసహనం వ్యక్తం చేస్తున్నారు. 

యూఎస్‌ఏ, వెస్టిండీస్‌ వేదికగా జూన్‌ 2 నుంచి టీ20 ప్రపంచకప్‌ టోర్నీ ప్రారంభం కానుంది. జూన్‌ 5న ఐర్లాండ్‌తో భారత్‌ తన తొలి మ్యాచ్‌ ఆడనుంది.