సీఎస్‌ను వెంటనే బదిలీ చేయాలి: రఘురామ

ఈనాడు డిజిటల్‌, భీమవరం: రాష్ట్రంలో ఎన్నికలు సజావుగా జరగాలంటే సీఎస్‌నూ వెంటనే బదిలీ చేయాలని నరసాపురం ఎంపీ, తెదేపా ఉండి నియోజకవర్గ అభ్యర్థి రఘురామకృష్ణరాజు డిమాండు చేశారు. పశ్చిమగోదావరి జిల్లా పెదఅమిరంలోని తన కార్యాలయంలో సోమవారం నిర్వహించిన ‘రచ్చబండ’ కార్యక్రమంలో ఆయన మాట్లాడారు. తెదేపా, జనసేన, భాజపా కూటమి దెబ్బకు వైకాపా గల్లంతు కానుందని.. అన్ని సర్వేల్లోనూ ఇదే స్పష్టమవుతోందని ఆయన చెప్పారు. ‘ఉభయగోదావరి జిల్లాల్లో కూటమి క్లీన్‌స్వీప్‌ చేయడం ఖాయం. భూ హక్కు చట్టం గురించి ప్రజలకు వివరించినందుకు చంద్రబాబు, లోకేశ్‌పై కేసులు నమోదు చేయడం వైకాపా దమనకాండకు నిదర్శనం. మాతృభాషను అవమానించేందుకు జగన్‌ చేస్తున్న ప్రయత్నాలను అడ్డుకుంటామని అమిత్‌షా అంటే.. ఈ అంశాన్ని సాక్షి పత్రిక వక్రీకరించి రాయడం సిగ్గుచేటు’ అని పేర్కొన్నారు.