Gangula Kamalakar: బొత్స వ్యాఖ్యలపై మంత్రి గంగుల కమలాకర్‌ కౌంటర్‌

కరీంనగర్‌: ఏపీ మంత్రి బొత్స సత్యనారాయణ(Botsa)పై తెలంగాణ మంత్రి గంగుల కమలాకర్‌ (Gangula Kamalakar) తీవ్ర ఆగ్రహం వ్యక్తం చేశారు. తెలంగాణ విద్యావ్యవస్థపై బొత్స చేసిన వ్యాఖ్యలను ఆయన ఖండించారు. కరీంనగర్‌లో మీడియాతో గంగుల కమలాకర్‌ మాట్లాడారు.

• ఇదీ చదవండి: తెలంగాణ విద్యావ్యవస్థపై ఏపీ మంత్రి బొత్స కీలక వ్యాఖ్యలు

దేశంలో అత్యున్నత విద్యను అందిస్తోంది కేసీఆర్‌ ప్రభుత్వమని గంగుల కమలాకర్‌ అన్నారు. పోరాడి సాధించుకున్న తెలంగాణపై ఇంకా విషం చిమ్ముతున్నారంటూ ఆయన మండిపడ్డారు. టీఎస్‌పీఎస్సీ పేపర్‌ లీకేజ్‌ కేసులో నిందితులను పట్టుకుని జైలుకు పంపి తమ చిత్తశుద్ధిని నిరూపించుకున్నామన్నారు. ఏపీలో టీచర్ల బదిలీలకు రూ.లక్షకు పైగా ఇవ్వాల్సిన పరిస్థితి ఇప్పటికీ ఉందని ఆరోపించారు. తెలంగాణలో ఆ ప్రక్రియ పారదర్శకంగా కొనసాగుతోందని చెప్పారు. ఆంధ్రాలో ఎమ్మెల్యేలు, ఏపీపీఎస్సీ సభ్యులే వసూళ్లు చేసి ఉద్యోగాలు ఇస్తున్నారని గంగుల ఆరోపించారు. సాయంత్రంలోపు దీనిపై బొత్స స్పందించాలని డిమాండ్‌ చేశారు. స్పందించిన తర్వాత ఆయన హైదరాబాద్‌లో అడుగులుపెట్టాలన్నారు. బొత్స సత్యనారాయణను వెంటనే మంత్రివర్గం నుంచి బర్తరఫ్‌ చేయాలని గంగుల కమలాకర్‌ డిమాండ్‌ చేశారు.