Ganta Srinivasarao: అలాంటిదేమైనా ఉంటే నేనే చెప్తా: గంటా శ్రీనివాసరావు

విజయవాడ: తాను పార్టీ మారుతున్నానంటూ జరుగుతున్న ప్రచారంలో వాస్తవం లేదని.. అలాంటిదేమైనా ఉంటే తానే చెప్తానని మాజీ మంత్రి గంటా శ్రీనివాసరావు పునరుద్ఘాటించారు. బుధవారం రాత్రి విజయవాడలోని గంటా నివాసంలో ఆయనతో భాజపా నేత కన్నా లక్ష్మీనారాయణ, తెదేపా నేత బొండా ఉమామహేశ్వరరావు భేటీ కావడం రాజకీయంగా ప్రాధాన్యత సంతరించుకుంది.

ఈ నేపథ్యంలో మీడియా ప్రతినిధులు గంటాను ప్రశ్నించగా ఓ వివాహం సందర్భంగా అందరం కలిశామని చెప్పారు. ఇది సాధారణమేనని.. దీనిలో ఎలాంటి రాజకీయ ప్రాధాన్యం ఏమీ లేదని స్పష్టం చేశారు. జనసేన రాజకీయ వ్యవహారాల కమిటీ ఛైర్మన్‌ నాదెండ్ల మనోహర్‌తో మాజీ మంత్రి కన్నా బుధవారం భేటీ అయిన విషయం తెలిసిందే. ఆ తర్వాత గంటాతోనూ కన్నా లక్ష్మీనారాయణ సమావేశం కావడం చర్చనీయాంశమైంది.