తితిదే ఆస్తులు అమ్ముతారా? పునరాలోచించండి!

సుబ్బారెడ్డికి బోర్డు ప్రత్యేక ఆహ్వానితుడు రాకేశ్‌ సిన్హా లేఖ

తిరుపతి: తిరుమల తిరుపతి దేవస్థానం ఆస్తుల అమ్మకం నిలిపివేయాలని తితిదే బోర్డు ప్రత్యేక ఆహ్వానితుడు, రాజ్యసభ సభ్యుడు రాకేశ్‌ సిన్హా కోరారు. ఈ మేరకు ఆయన తితిదే ఛైర్మన్‌ వైవీ సుబ్బారెడ్డికి లేఖ రాశారు. బోర్డు నిర్ణయాన్ని పునఃసమీక్షించాలని కోరారు. శ్రీవారికి భక్తులు విరాళంగా ఆస్తులు ఇచ్చారనీ.. భక్తుల మనోభావాలకు సంబంధించిన అంశమైనందున ఈ నిర్ణయాన్ని పునఃసమీక్షించాలని ఆయన సుబ్బారెడ్డిని కోరారు. 

శ్రీవారి స్థిరాస్తులను అమ్మాలని తితిదే ధర్మకర్తల మండలి నిర్ణయం తీసుకున్న విషయం తెలిసిందే. తమిళనాడులో ఉన్న 23 ఆస్తులు విక్రయించాలని ఎనిమిది మంది అధికారులతో రెండు ప్రత్యేక బృందాలు ఏర్పాటు చేసింది. ఈ ఆస్తుల బహిరంగ వేలానికి సంబంధించి విధివిధానాలు ఖరారు చేయాలని ఆదేశించింది. తితిదే తీసుకున్న ఈ నిర్ణయంపై ఇప్పటికే విమర్శలు వెల్లువెత్తుతున్నాయి. ఈ నేపథ్యంలో బోర్డు సభ్యుడే లేఖ రాయడం మరింత  తీవ్ర ప్రభావం చూపనుంది. ఈ నెల 28న జరిగే ధర్మకర్తల మండలి సమావేశంలో దీనిపై పూర్తిస్థాయిలో చర్చ జరిగే అవకాశం ఉంది.